Novas | 1 a 10 de 3784

Siguiente >>

26/09/2022
A Filmoteca de Galicia reabre a súa sala de proxeccións

Este vindeiro martes, 27 de setembro, terá lugar a reapertura ao público das instalacións da Filmoteca de Galicia (anteriormente CGAI) na Casa da Cultura Salvador de Madariaga coa volta da programación de proxeccións á sala de cine José Sellier. Estas instalacións estiveron pechadas desde o pasado ano para a realización dunhas obras de renovación que incluíron unha reforma completa do espazo de exhibición, coa modernización na cabina de proxección, na súa dotación tecnolóxica e de substitución de butacas e demais mobiliario.. Amplía a nova>>

23/09/2022
O Galician Freaky Film Fest achega sesenta filmes a Vigo

Unha proxección de The Thing, de John Carpenter, con ocasión dos 40 anos da súa estrea, abre este 23 de setembro as actividades do sexto Galician Freaky Film Fest (GFFF) en Vigo. Na mesma sesión poderá verse o The Hunchback of Notre Dame con música ao vivo da man da Caspervek Orquestra.. Amplía a nova>>

21/09/2022
Play-Doc presenta o programa internacional VENTURA de apoio ao cine independente

A Asociación Cultural Enfoques, responsable da organización do festival internacional de cine Play-Doc de Tui, ven de anunciar a posta en marcha do proxecto VENTURA, unha iniciativa aglutinadora, de encontro e de apoio para cineastas e a produtores internacionais de películas independentes con ambición artística. VENTURA ten como obxectivo potenciar voces singulares e está ideado como un espazo de traballo híbrido que combina as actividades presenciais coas virtuais, a través del proponse acompañar os proxectos cinematográficos en todas as súas fases para contribuír a xerar e alimentar unha comunidade internacional de profesionais da industria audiovisual con sede en Galicia. Ata o 21 de outubro poden inscribirse para participar no programa proxectos de calquera país, independentemente da etapa na que se atopen –desenvolvemento, produción ou postprodución–, sen restricións con respecto á duración, o formato ou o xénero cinematográfico.. Amplía a nova>>

20/09/2022
O filme portugués Amor Fati imponse no Festival Primavera de Cine

Cos premios do público e do xurado á mellor longametraxe, o filme da portuguesa Cláudia Varejão impúxose na XI edición do festival vigués. O xurado destacou desta obra a "poesía que destila en cada unha das súas imaxes. Unha película que nos ensina a experimentar o amor sen adxectivalo, alén das convencións que limitan a liberdade de gozalo con independencia de como ese amor se materializa".. Amplía a nova>>

19/09/2022
Os cineastas Eloy Domínguez e Lois Patiño comparten premio no FIC Bueu

As curtametraxes 'Rompente', de Eloy Domínguez e 'El sembrador de estrellas', Lois Patiño comparten "ex aequo' o Premio R á mellor curtametraxe galega desta edición do FIC BUEU. O Festival Internacional de Cinema de Bueu remataba a parte da competición da súa 15 edición facendo público o palmarés da sección oficial, no que o filme francés 'L'enfant salamandre', do director Théo Degen facíase co primeiro premio. Pola súa banda, o público elixía a cinta 'Vlekkeloos', da cineasta dos Países Baixos Emma Branderhorst. Da mesma orixe (Países Baixos) viña tamén a historia gañadora do Premio Descubertas, 'Minimal sway while starting my way up', da realizadora Stéphanie Lagarde. O director Salvador Sunyer leva o Premio á mellor curtametraxe española pola súa obra 'Alopècia Androgènica'.. Amplía a nova>>

16/09/2022
'Dalia, a modista' pasa da televisión á literatura

Seguindo un camiño inverso ao convencional, unha historia ven de transformarse de relato audiovisual en narración literaria, este é o caso singular de "Dalia, a modista". Baseada na miniserie de televisión homónima producida por CTV no ano 2016 e emitida pola TVG, ven de presentarse a novela, escrita por Noe Martínez (Ourense, 1975), unha das guionistas, xunto a Eligio R. Montero e Ghaleb Jaber Martínez, da serie. A Fundación Araguaney faise cargo da edición deste volume derivado dun produto audiovisual da produtora do Grupo Araguaney. 'Dalia, a modista' trátase dunha obra cunha trama de misterio, amor e superación ambientada nos anos 50, na vila de Prescedo. A serie na que a historia se puido seguir orixinalmente, obtivo en 2017 catro premios Mestre Mateo do Audiovisual dos doce nos que foi finalista e tamén foi recoñecida ese ano como mellor serie televisiva nos Premios CREA Asociación de Directores e Realizadores de Galicia. Na súa estrea na TVG, "Dalia a modista" obtivo una cota media de pantalla dun 17 por cento, con picos do 24 por cento de share. Retransmitida en varias canles autonómicas españolas (Aragón TV, CMMedia, Televisión Valenciana) e en Europa Europa, canle de televisión latinoamericano, conseguindo unha gran acollida en Arxentina, Chile e Perú.. Amplía a nova>>

15/09/2022
Curtocircuíto presenta un gran evento audiovisual e interdisciplinar na súa 19 edición

A 19ª edición de Curtocircuíto - Festival Internacional de Cine volve situar a ollada sobre a vangarda cinematográfica, incluíndo nas súas seccións competitivas as creacións máis recentes e arriscadas do panorama internacional. Curtocircuíto mantense fiel aos seus eixos de acción principais: o cine de autor e as linguaxes contemporáneas, así como a súa aposta polas artes vivas cun programa específico paralelo. O certame exhibe, do 1 ao 9 de outubro en Santiago de Compostela pezas de cineastas imprescindibles, así como doutros que despuntan co seu traballo máis actual. As seccións competitivas de Curtocircuíto 2022, Radar, Explora, Penínsulas e Planeta GZ reúnen un total de 56 títulos, sendo grande parte deles estreas a nivel estatal e galego. . Amplía a nova>>

14/09/2022
A XLIV Semana de Cine de Lugo homenaxea a María Casares e Margarita Ledo

Os nomes de María Casares e de Margarita Ledo agrandarán o Paseo do Cine de Lugo, vencellado á Semana de Cine da localidade , que este ano celebra a súa edición número corenta e catro. O evento homenaxeará así con dúas placas nese espazo á actriz coruñesa no seu centenario e á cineasta de Castro de Rei, Margarita Ledo, pola súa traxectoria. Ademais esta XLIV Semana do Cine de Lugo, organizada desde o Grupo Fotocinematográfico Fonmiñá, terá tamén un recordo especial para o escritor Darío Xohán Cabana, ao ano dende o seu pasamento. Outras persoas ou temas serán recordados tamén coas proxeccións de películas, como será o caso do actor José Luis López Vázquez polo seu centenario, coa proxección de "El bosque del lobo" ou a invasión rusa de Ucraína (coa película "El acorazado Potemkim"). O evento proxectará 131 filmes entre os días 19 e 24 de setembro en varios espazos que van desde a sede da Deputación provincial, o Vello Cárcere , a sede de Aspnais e .os nos centros penitenciarios de Teixeiro, Bonxe e Monterroso. . Amplía a nova>>

13/09/2022
O OUFF homenaxea o audiovisual galego cunha mostra de retratos

O Festival Internacional de Cinema de Ourense, que se celebrará entre os vindeiros 23 de setembro e 1 de outubro homenaxeará o audiovisual galego cunha mostra fotográfica. Xulio Gil asina as imaxes de Manual de dirección. Cineastas de Galicia, na que recolle 52 retratos dos principais directores e directoras de cine do país que desenvolven o seu labor durante as tres últimas décadas.. Amplía a nova>>

06/09/2022
Dá comezo a incubadora de proxectos audiovisuais do Clúster

I+P, INCUBA, a nova incubadora de proxectos de cine e televisión do Clúster Audiovisual Galego, deu comezo ao seu programa de incubación, na Coruña. Nesta primeira edición, seleccionáronse entre máis dun cento de proxectos presentados, seis propostas: "Sonámbulo", de Vaca Films Studio; "As defensas", de Cósmica Producións; "Juliette y Camille", de Anxos Fazáns e Silvia Fuentes; "Nexo", de Voz Audiovisual”; "Una de bravas", de Anna M. Bofarull, e "Cebra con lunares (Polka dot Zebra)", de Xosé Zapata. I+P, INCUBA ten como obxectivo a incubación e mellora significativa destes seis proxectos audiovisuais na fase de desenvolvemento a través de titorías, webinarios e consultaría. O programa consistirá no desenvolvemento de sesións presenciais na Coruña e sesións online entre os meses de setembro, outubro e novembro. Ao finalizar a incubación os proxectos participantes presentaranse en decembro no pitching "I+P, Ideas para Producir" e beneficiaranse dunha subscrición na plataforma Filmarket Hub. . Amplía a nova>>

Siguiente >>

Noticias|Reportaxes|Historia|Documentos|Certames|Boletíns|Como estar en AVG |Vantaxes de AVG |Avísanos

AVG | O soportal do audiovisual galego | culturagalega.org


Consello da Cultura Galega
Pazo de Raxoi, 2 andar. 15704 Santiago de Compostela (Galicia)
Tfno: 981957202 / Fax : 981957205 / e-mail: redaccion@culturagalega.org