Novas | 1 a 10 de 3322

Siguiente >>

17/01/2020
'Hierro' de Portocabo gaña o Premio Feroz á mellor serie dramática de 2019

Os Premios Feroz outorgados pola Asociación de Informadores Cinematográficos de España que premian varias categorías en traballos cinematográficos e televisivos tiveron onte a gala na que repartían os galardóns sobre a produción de 2019. No apartado televisivo o premio para a mellor serie foi para Hierro, da produtora galega Portocabo, dirixida por Jorge Coira e creada por Pepe Coira, con guión del mesmo e de Carlos Portela, Fran Araújo, Araceli Gonda e Coral Cruz. Ademais na montaxe tamén participaron, ademais de Jorge Coira, Diana Toucedo e Gaspar Broullón. A produción, que se emite en Movistar +, acadou ademais o recoñecemento para a súa actriz principal, Candela Peña. Outra produción galega, a película Quien a hierro mata, de Vaca Films, acadou tamén un galardón ao mellor actor de reparto para o catalán Enric Auquer. A pesar das súas cinco candidaturas O que arde non acadou ningún galardón nunha noite na que a nivel cinematográfico a película de pedro Almodovar Dolor y gloria acaparou o palmarés con seis premios. . Amplía a nova>>

14/01/2020
A serie 'Néboa' de Voz Audiovisual fai presentación en Madrid

A néboa galega chegou onte a Madrid coa serie de televisión dese mesmo nome producida por Voz Audiovisual para TVE e que se comezará a emitir este mércores na canle pública. A presentación comezou xa de mañá na sede da Xunta, a Casa de Galicia, onde se fixo a preestrea do primeiro capítulo coa presencia do equipo técnico, artístico e de produción. Ä noite fíxose a posta de longo con alfombra vermella á que acudiron moitas caras do audiovisual galego. Néboa é unha serie de intriga gravada na costa de Ortegal na que a presenza galega non radica só na localización e en gran parte do seu equipo artístico e de produción senón tamén no uso da mitoloxía e as crenzas populares da nosa terra arredor do entroido como contexto dunha trama criminal. Gonzalo López Gallego dirixe esta produción na que conta cun reparto coral encabezado polas actrices Emma Suárez e Isabel Naveira no que tamén teñen importantes papeis Alba Galocha, Antonio Durán “Morris”, María Vázquez, Nancho Novo, Xabier Deive, Denisse Peña, Santi Prego, Alfonso Agra e Denís Gómez, entre outros. A ministra de Traballo, Yolanda Díaz, o conselleiro de Cultura, Román Rodríguez, o presidente de Agadic, Jacobo Sutil apoiaron coa súa presenza esta presentación na que tamén estiveron moitas outras cara coñecidas do audiovisual e a escena teatral galega. . Amplía a nova>>

10/01/2020
Quiosco: Papeis da Academia

Coa fin de 2019 a Academia Galega do Audiovisual puxo na rede unha nova entrega da súa publicación Papeis da Academia. A presenza do audiovisual nas aulas centra este número, que conta con contribucións de Manolo Gonzalez, Coque Dosil, Marcos Nine, Jorge Rivero, Cristina De La Torre, Roberto Varela, Mónica García Iglesias, Ana Moreiras, Alfonso Blanco, Emma Lustres, Ghaleb Jaber, Beli Martínez, Andrea Vázquez, Ramiro Ledo, Sara Donoso ou Ana Miguez. Nos contidos, atópanse propostas de filmes para traballar nas aulas canda a un repaso por diferentes iniciativas educativas neste campo. . Amplía a nova>>

07/01/2020
O CGAI celebra a década do Novo Cinema Galego

O Centro Galego de Artes da Imaxe propón neste xaneiro de 2020 a celebración dunha década desde o nacemento do movemento audiovisual denominado Novo Cinema Galego. Baixo o acrónimo NCG10 a institución programará nos próximos meses dentro do ciclo OFFGalicia varios dos traballos desta nova xeración de creadores cinematográficos englobados baixo esa etiqueta acuñada nun artigo do crítico Martin Pawley o 2 de xaneiro de 2010. Durante este ano o CGAI exhibirá pezas feitas nesta década por Peque Varela, Eloy Enciso, Xurxo Chirro, Lois Patiño, Jaione Camborda, Víctor Hugo Seoane, Marcos Nine, Ángel Santos, Lara Bacelo, Ramiro Ledo, o dúo WeAReQQ, comezando polos traballos previos de dúas figuras clave, Óliver Laxe e Alberte Pagán. O CGAI lembra que hai dez anos chegaba a Quincena de Realizadores do festival francés de Cannes a película de Laxe Todos vos sodes capitáns marcando un punto de inflexión inmediato, co éxito do filme e o seu director, Óliver Laxe, convertido no único cineasta representante español no festival. Desde o CGAI ven que baixo esta etiqueta hai unha posición común en canto a "asunción de riscos, a certeza de que non hai máis límites para facer arte que os do talento que se posúa, a vontade de participar nos debates estéticos que sacoden o cine no resto do planeta provocando obras en moitos casos innovadoras, que non chega tarde, que se suma ás tendencias e correntes creativas en tempo presente". O eclecticismo formativo, a creación de abondosas sinerxias ou o papel protagonista dos festivais forman parte do ADN deste Novo Cinema Galego segundo o Centro. As exhibicións comezará o vindeiro 11 de xaneiro con Grrr! nº 7: Y las chimeneas decidieron escapar de Oliver Laxe e Enrique Aguilar; Grrr! nº 8: Suena la trompeta, ahora veo otra cara de Oliver Laxe e París #1, tamén de Laxe.. Amplía a nova>>

02/01/2020
Chega á rede a webserie Hai vida en Bran?

Xa están dispoñibles en Youtube os catro episodios que compoñen Hai vida en Bran?. Ángela Andrada dirixe esta webserie que foi galardoada na IV edición do Carballo Interplay. O retorno á vila natal dunha licenciada en Belas Artes obriga á protagonista a redescubrir esta realidade. Un traballo con grandes doses de humor que reflexiona sobre a situación da mocidade galega no rural.. Amplía a nova>>

30/12/2019
O CCG celebra os 30 anos do audiovisual galego

Este 2019 que remata é o ano no que o audiovisual galego conmemorou os 30 anos da estrea das tres primeiras longametraxes en lingua galega: Sempre Xonxa, Continental e Urxa. Para celebralo, o Consello da Cultura Galega creou un sitio web en colaboración coa Corporación de Radio Televisión de Galicia no que xa se pode ver en liña a película Sempre Xonxa, se agrupan reportaxes de culturagalega.gal sobre a rodaxe e concepción dos filmes, con declaracións dos membros do equipo e acceder a unha completa unidade didáctica elaborada polo profesor José Antonio Cascudo. O obxectivo é reivindicar estes tres filmes como parte esencial da cultura galega contemporánea, pero tamén crear unha ferramenta que permita achegar as orixes do audiovisual galego de ficción ás escolas. O seguinte chanzo será a difusión do filme Continental o 15 de xaneiro e, posteriormente, máis vizosos contidos multimedia que enriquecerán este proxecto durante os seus doce meses de duración. . Amplía a nova>>

23/12/2019
Rubén Coca gaña o Premio de Guión en galego para longametraxes

O guionista e realizador Rubén Coca (Ferrol, 1977) alzouse co Iº Premio de Guión para longametraxes da Asociación de Guionistas de Galicia (AGAG) polo seu texto Detrás da luz. Un xurado conformado por Xacobo Díaz, Xosé Antón Cascuda, Sara Gómez e Óscar Cruz, decidiu por unanimidade designar a Coca como gañador dándolle o premio de 2.500 euros que comporta esta primeira edición do certame. Sobre Detrás da luz o xurado di que se trata de "unha proposta capaz de crear un universo propio, cun relato que flúe en clave simbólica entre a beleza e o terror, coa construción de secuencias que suxiren por si mesmas imaxes e inquietantes atmosferas". Para eles Detrás da luz "constitúe unha profunda reflexión sobre a condición humana que destaca ademais polo seu interese social e a viabilidade para a súa produción". Abel Álvarez e Martín Suárez resultaron finalistas do certame de guións en galego por detrás de Rubén Coca. A Fundación SGAE, en Compostela, acolleu a gala de entrega do I Premio de guión en galego para longametraxe 2019, organizado pola Asociación Sindical Galega de Guionistas (AGAG) co apoio da Fundación SGAE e a colaboración de Filmarkethub. O premio nace co obxectivo de mellorar a presenza da lingua galega no audiovisual, promover autores que escriben en galego e contribuír a difundir o traballo dos membros de AGAG.. Amplía a nova>>

19/12/2019
A Galiña Turuleca volve ao circo da man de Filmax

A canción A galiña Turuleca do circo televisivo dos pallasos, Gaby, Fofó e Miliki dos anos 70, que deixou pegada en varias xeneracións desde aquela, pola transmisión popular moito tempo despois da desaparición do programa, volve agora con forma de personaxe de animación 3D. A produtora Filmax en coprodución con Tandem Films presentaron onte en sociedade esta película que se estreará en cines o 1 de xaneiro e da que haberá versión en galego. O conselleiro de Cultura e Turismo, Román Rodríguez, participou hoxe no Pazo de Congresos e Exposicións de Galicia na presentación da película de animación 3D que retoma á personaxe da famosa canción infantil Ademais da estrea en Galicia e no resto de España o filme lanzarase na Arxentina en xullo do vindeiro ano. Turuleca é unha galiña singular cun peculiar aspecto que non lle permite poñer ovos, o que destaca ás burlas do resto do galiñeiro. Un día, Isabel, unha exprofesora de música que a leva a vivir a súa granxa e descobre o seu talento oculto: Turuleca pode falar e cantar. Diversas situacións da historia levan á galiña a entrar nun circo como parte da súa aventura, polo que resulta o paradoxo que volve ao contexto circense no que se creou a súa personaxe. Para relatar esta historia, na película combínanse divertidas cancións orixinais e versións de temas mundialmente coñecidos como La Macarena, La vie en rose ou Será que no me amas coas célebres cancións dos Pallasos Gaby, Fofó e Miliki. Por outra banda, cómpre destacar que despois da estrea, e grazas á implicación da Fundación Andrea, que se dedica á atención de nenos hospitalizados e dar soporte ás súas familias, a película proxectarase nos hospitais das sete cidades galegas, onde os nenos ingresados poderán desfrutar das aventuras de Turuleca. . Amplía a nova>>

18/12/2019
Pepe Galán gaña o certame de curtas sobre literatura da AS-PG

A Asociación Socio-Pedagóxica Galega (AS-PG) ven de entregar os premios da súa IXª certame de curtametraxes que tiña como requisito que as pezas fose de menos de 30 minutos e xirarán ao redor da literatura galega, interpretando ou explorando calquera texto de calquera época. Na categoría xeral o primeiro premio foi para o artista Pepe Galán, vencellado á escultura, que levou o primeiro premio por Mulleres Muro, a garda patética. O segundo premio foi para o realizador Daniel Chapela pola súa peza sobre a escritora Emma Pedreira, Emma Pedreira. O des-en-freo. Ademais a a AS-PG, dentro dos seus obxectivos, tamén premia a traballos levados a cabo polos estudantes dos centro de ensino do país e neste caso o primeiro premio nesa categoría foi para Cristina de La Torre (IES Macías o Namorado- Padrón) pola súa obra Rosalía, quilómetro cero. María Jesús López Abelairas (CEIP Martagona-Melide) levou o segundo premio pola curtametraxe A mellor sopa do mundo e a peza Irmaus – Celso Emilio, asinada en equipo polo alumnado de 1º bacharelato do IES María Soliño de Cangas obtivo unha mención especial.. Amplía a nova>>

17/12/2019
Agadic lanza a convocatoria mellorada de axudas a festivais audiovisuais para 2020

A Consellería de Cultura e Turismo, a través da Axencia Galega das Industrias Culturais (Agadic), publica hoxe no Diario Oficial de Galicia (DOG) a convocatoria de subvencións a festivais do sector audiovisual para 2020 cunha dotación de 190.000 euros, o que supón un incremento de máis dun 11% respecto á de 2019. Os festivais audiovisuais proliferan polas localidades galegas dando presenza e saída a diversos xeitos de achegarse ao audiovisual. Só dentro da coordinadora de festivais Proxecta hai 14 destes eventos, pero fanse aínda moitos máis. As bases da convocatoria especifican que esta se dirixe tanto a persoas físicas e xurídicas privadas como a entidades locais organizadoras de certames, semanas ou mostras celebradas entre o 1 de novembro de 2019 e o 31 de outubro de 2020, sempre que conten cunha duración mínima de catro xornadas (cando menos, con 20 proxeccións), e teñan realizado tres edicións consecutivas en anos anteriores. Entre outros requisitos, a proposta de programación debe conter o cinco por cento de títulos ou cinco sesións de produción cinematográfica e/ou dirección galegas. O prazo de presentación de solicitudes estará aberto desde mañá día 18 de decembro e ata o 17 de xaneiro. Amplía a nova>>

Siguiente >>

Noticias|Reportaxes|Historia|Documentos|Certames|Boletíns|Como estar en AVG |Vantaxes de AVG |Avísanos

AVG | O soportal do audiovisual galego | culturagalega.org


Consello da Cultura Galega
Pazo de Raxoi, 2 andar. 15704 Santiago de Compostela (Galicia)
Tfno: 981957202 / Fax : 981957205 / e-mail: redaccion@culturagalega.org