Novas | 1 a 10 de 3642

Siguiente >>

22/10/2021
O LAV.Mov retorna a Vedra

Despois da ausencia do pasado ano por mor da pandemia, a Asociación Senunpeso celebra entre o 29 e o 31 de outubro unha nova edición do seu LAV.Mov. O Laboratorio Audiovisual de Vedra, centrado na formación e a creación audiovisual, inclúe no seu programa un obradoiro de formación centrado no uso de found footage para crear unha peza audiovisual a partir de imaxes de arquivo da man de Javier Trigales. Un segundo obradoiro a cargo de Fernando Alfonsín abordarán os fluxos de traballo con imaxe dixital desde o set de rodaxe, pasando pola postprodución ata o produto final. . Amplía a nova>>

18/10/2021
Margarita Ledo Premio CREA de Honra

A Asociación Galega de Profesionais da Realización e da Dirección (CREA) ven de recoñecer a aqueles dos seus colegas que destacaron nos traballos de dirección no pasado ano. Os VI Premios CREA entregáronse o 17 de outubro de 2021 recaendo o Premio de Honra na cineasta e académica Margarita Ledo, o de Mellor Dirección de Longametraxe de Ficción en Fon Cortizo por '9 Fugas' e o de Mellor Dirección de Serie de televisión en Jorge Coira por 'Hierro' (Tempada 2). . Amplía a nova>>

18/10/2021
AMAL volve servir de vía de entrada do cine euroárabe

A decimo novena Semana de Cinema Euroárabe AMAL 2021 organizada pola Fundación Araguaney-Puente de Culturas celebrarase entre os días 25 e 29 de outubro no Teatro Principal de Santiago. A programación deste ano inclúe unha ampla representación do mundo árabe, con películas de Palestina, Sudán, Marrocos e Europa. Proxectaranse cinco cintas –tres ficción e dous documentais– que se poderán ver nun pase único por día ás 21:00 horas. Treas das proxeccións serán premieres en España e outra delas o será en Galicia. Así as longametraxes documentais "Gods of Molenbeek ( Aatos ja Amine)" e "Lift like a girl" e a ficción "200 metros (200 METERS)" será a primeira vez que se vexan en territorio español e a ficción "You will die at 20 ( Satamoto Fel Eshreen)", será premiere en Galicia. . Amplía a nova>>

18/10/2021
Premio do público de Sitges para 'Jacinto' de Javi Camiño

O público da 54ª edición do Sitges Festival Internacional de Cine Fantástico de Catalunya ven de darlle a súa máxima valoración na sección Panorama Fantástico á longametraxe Jacinto (ronda o demo), do realizador santiagués Javi Camiño, protagonizada por Pedro Brandariz. A ópera prima de Camiño, unha historia que se define como "a mestura perfecta entre a 'Matanza de Texas' e 'Forrest Gump'" resultou gañadora na súa estrea nacional neste apartado dos premios do público do festival dirixido a títulos de toda as nacionalidades, inéditos en España e de temática fantástica e de terror feitos con vocación independente. Jacinto xa acadara previamente dous premios no festival GenreBlast en Winchester, Virginia (EE.UU).. Amplía a nova>>

15/10/2021
O Premios Mestre Mateo miran máis alá da televisión

O disparo de saída da que será a vixésima edición do Premios Mestre Mateo do Audiovisual Galego ven de darse coa publicación das bases de presentación e a apertura do prazo, onte mesmo. A Academia Galega do Audiovisual fixo para a ocasión unha renovación de determinadas condicións das bases "atendendo ás demandas do sector e aos novos hábitos de consumo dos espectadores". Os cambios sinalan a unha apertura de determinados premios (Mellor Programa, Mellor Realización e Mellor Comunicador/a) máis alá dun formato puramente de emisión televisiva, incluíndo contidos xerados e difundidos por Internet nas redes sociais ou calquera outro medio ou plataforma audiovisual. . Amplía a nova>>

11/10/2021
Xacio Baño gaña o Premio Galiza do Curtocircuíto con 'Augas abisais'

O relato audiovisual de Xacio Baño na curtametraxe 'Augas abisais' acadou o Premio Galiza da rematada edición do festival Curtocircuíto, en Santiago de Compostela. 'Augas abisais' crea un paralelismo entre mergullarse no fondo do océano e na propia historia, partindo dunhas lembranzas e correspondencia de tempos moi pasados pero aínda presentes. O xurado decantouse por esta cinta valorando o seu logro a través de "técnicas cinemáticas orixinais para falar do pasado mentres se escava o presente, por atopar un camiño metafórico cara a narración que pode destapar e rexistrar a procura dese propio camiño, e por iluminar unha experiencia persoal que lanza luz sobre o colectivo". O filme acadou ademais un Premio AGAG ao mellor guión galego, concedido ex aequo coa curta 'Homeless Home', de Alberto Vázquez. Esta última tamén acadou o premio CREA á mellor dirección dunha produción galega. O xurado considerou que Alberto Vázquez "foi quen de construír un mundo dunha natureza gráfica e sonora única", e concedeulle ese galardón tamén á súa cinta "polo uso dun trasfondo social duro, porque non todos os retornos a casa son unha apoteose como na Odisea". . Amplía a nova>>

11/10/2021
'Eles transportan a morte' sae de Cinespaña con dous galardóns

O festival Cinespaña de Toulouse ven de recoñecer á longametraxe 'Eles transportan a morte' con dous dos premios no palmarés da súa 26ª edición. O tándem de dirección formado por Helena Girón e Samuel M. Delgado acadou o premio á Mellor Realización, mentres que o traballo feito no son e a música por Carlos García e Camilo Sanabria, respectivamente, foi recoñecido tamén co premio técnico desa categoría, traballo que xa foi tamén premiado previamente pola Semana da Crítica de Venecia, que recoñeceu a achega técnica do filme en canto ao traballo coas atmosferas sonoras.. Amplía a nova>>

06/10/2021
O Hub Audiovisual concede a súa primeira axuda para a rodaxe da serie 'Rapa'

O comezo da rodaxe da serie 'Rapa', producida por Movistar + xunto á empresa galega Portocabo, coincide coa resolución por parte da Xunta da concesión dunha axuda de 300.000 euros a este proxecto, que se converte así no primeiro adxudicatario da liña para a atracción de rodaxes do novo Hub Audiovisual da Industria Cultural. A presentación de inicio da rodaxe, que se levará a cabo nas zonas de Cedeira, Ferrol e a Serra da Capelada contou coa presenza do conselleiro de Cultura, Educación e Universidade, Román Rodríguez, así como do Delegado do Goberno en Galicia, José Miñones. 'Rapa' é unha trama creada por Pepe Coira e Fran Araújo e dirixida por Jorge Coira, con Alfonso Blanco na produción executiva, os actores Javier Cámara e Mónica López encabezan o reparto desta intriga de seis episodios de 50 minutos con estrea prevista en 2022.. Amplía a nova>>

04/10/2021
'Matria' pasa de curta a longa

Nos anos 2017 e 2018 Álvaro Gago sorprendía coa súa curtametraxe 'Matria', coa que gañou o premio do Xurado do Festival de Cinema de Sundance, o galardón á mellor curtametraxe española da Semana Internacional de Cine (Seminci) de Valladolid e outros sesenta galardóns por todo o mundo. Agora o realizador ven de comezar a rodaxe en diferentes localizacións da provincia de Pontevedra da que será a súa primeira longametraxe, para a que colle como base xustamente a historia de 'Matria' levando a cabo unha pouco habitual evolución de formato sobre a mesma sinopse. . Amplía a nova>>

01/10/2021
O filme belga Playground érguese como vencedor no OUFF

O Festival de Cine de Ourense, OUFF, deu coñecer este 30 de setembro o seu palmarés, que encabeza o filme belgaPlayground, dirixido por Laura Wandel. A longametraxe que aborda a problemática do acoso escolar a través de dúas crianzas alzouse coa Calpurnia á mellor película e a súa directora recibiu ademais o premio Cima da Asociación de Mulleres Cineastas e de Medios Audiovisuais. O Premio Especial do Xurado levouno Cima de Pepe Valle, e o Premio Xacobeo ao mellor filme galego, dotado con 12.000 euros, repartiuse entre Malencolía de Alfonso Zarauza e Eles transportan a morte de Helena Girón e Samuel M. Delgado.. Amplía a nova>>

Siguiente >>

Noticias|Reportaxes|Historia|Documentos|Certames|Boletíns|Como estar en AVG |Vantaxes de AVG |Avísanos

AVG | O soportal do audiovisual galego | culturagalega.org


Consello da Cultura Galega
Pazo de Raxoi, 2 andar. 15704 Santiago de Compostela (Galicia)
Tfno: 981957202 / Fax : 981957205 / e-mail: redaccion@culturagalega.org