Disque o emperador toleou. Disque despareceu tres días logo de morrer a súa irmá, coa que, disque, se levaba ben de máis... non sei se me explico.

Pois disque marchou, e que ó voltar viña dicindo que quería a lúa... Dese aquela nada voltou ser coma antes. Comezou a dictar leis inxustas, matando sen sentido... Disque secuestrou a esposa dalgún patricio, que quere que o veneren coma un deus, que ten o país aterrorizado...

Din tamén que cre estar iluminado. Que a liberdade é non dar importancia a nada, e que se exercita na liberdade facendo e desfacendo ó seu antollo. Vístese de bailarina, toma canta muller lle apetece, ... Disque o que quere é facer que o imposible se faga posible e que todos os homes vivan para sempre.

Disque o que quere é a lúa, e mesmo algúns dos que conspiran contra el o comprenden en parte...
Non sei onde irá dar isto.