Ir ao contido directamente.


aCentral Folque publica unha escolma das recollidas musicais de Gustav Henningsen

Xénero: Folk | 21 / 2 / 2018

gravacions6868_Henningsen.jpg

Gustav Henningsen. Gravacións musicais en Galiza 1964-1968 é último título da colección "A chave mestra" que publica aCentral Folque. O novo libro CD recolle unha escolma de 38 cortes das gravacións de carácter musical que este antropólogo dinamarqués realizou durante o seu traballo de campo no noso país, maiormente na comarca de Ordes. Os etnomusicólogos Xavier Groba e Sergio de la Ossa foron os responsables de escolmar o material dun estenso arquivo fonográfico que ata hoxe estaba inédito. Ademais do CD, a publicación inclúe un ensaio divulgativo, a transcrición das melodías e unha escolma de fotografías inéditas realizadas por Henningsen.

Juan Durán faise co Premio Reina Sofía de Composición Musical

Xénero: Clásica/Lírica | 19 / 2 / 2018

image not available

O Premio Reina Sofía de Composición Musical 2018 que convoca a Fundación Ferrer-Salat, ten nome galego. O xurado deste prestixioso galardón seleccionou a obra Whispers in the Dark, do vigués Juan Durán, como traballo gañador da última xeira. Este premio, "destinado a estimular a creación musical para orquesta sinfónica nas súas diferentes modalidades e facilitar aos compositores a posibilidade de que a súa música poida ser interpretada, escoitada e difundida" está dotado con 35.000 euros en metálico. Ademais, a Orquestra Sinfónica de Radiotelevisión Española estreará o vindeiro mes de outubro a peza premiada no Teatro Monumental de Madrid. O xurado do premio estivo formado por Martín Matalón, David del Puerto, Antonio Lauzurika, Jesús Rueda e Michael Thomas.

Quinito Mourelle presenta hoxe en concerto o disco 'Suite de las ocho'

Xénero: Jazz/Blues | 14 / 2 / 2018

not_28366.jpg

O Teatro Colón da Coruña acolle hoxe ás 20:30 horas a estrea absoluta de Suite de las ocho, novo traballo de pezas propias do compositor, pianista e xornalista Quinito Mourelle, arranxadas para orquestra de cámara por Roberto Somoza. Este é os segundo disco de Quinito Mourelle. Os oito temas orixinais que se reúnen neste traballo percorren transversalmente a música jazz e a clásica xuntando a sonoridade e a narrativa da música clásica cos valores da improvisación jazzística. A Orquestra de Cámara Galega. Dirixida por Roberto Groba acompaña ao piano de Mourelle e o clarinete de Somoza na posta en escena da suite. O disco gravouse no Auditorio de Galicia en Santiago de Compostela con produción de Pablo Barreiro.

O compás de Xabier Díaz & Adufeiras do Salitre sinala o futuro do norte

Xénero: Folk | 6 / 2 / 2018

noro_xabierdiaz&adufeirassalitre.jpg

O novo álbum de Xabier Díaz e Adufeiras de Salitre leva por nome Noró (algunhas músicas do Norte) (Músicas de Salitre, 2018) e chega hoxe a todas as tendas e plataformas marcando coa súa saída unha das datas relevantes do ano no que á musica galega se refire. Noró ofrécenos 13 temas de carácter tradicional pero de composición propia que sitúan o combo formado por Díaz e as Adufeiras de novo na punta da contemporaneidade con raíz.

A banda Oh Ayatollah presenta o seu primeiro disco longo

Xénero: Pop | 2 / 2 / 2018

ohAyatollah_28322.jpg

A Sala Capitol de Santiago acolle hoxe o concerto de presentación do primeiro disco longo da banda Oh! Ayatollah. O grupo compostelán presentarán Volve a canción protesta (Autoeditado) que sae en edición dixital e vinilo e para a ocasión estarán acompañados por outras bandas amigas (Familia Caamagno, Atrás tigre, Ataque Escampe e The Homens). Nove temas propios en galego enchen o disco Volve a canción protesta ofrecendo unha liña musical emparentada co pop-punk dos primeiros tempos máis contestatarios da movida dos oitenta, cunha actitude claramente sarcástica e irreverente. Mentres pezas como Animal poden levarnos a unha escoita "mod" moi británica hai outros como Case todo é o que parece conéctanos directamente cos ecos daqueles Aerolíneas Federales. Na lista de cancións tamén hai lugar para propostas máis guitarreiras como en Ei Ei. A frescura, variedade e coherencia da lista son promesa de bos directos. O álbum foi gravado e mesturado por Hevi no Laboratorio Soyuz en xullo do 2017 e masterizado por Cem Oral en Jammin' Masters (Berlín). O tema de lanzamento, que da nome ao disco, xa foi lanzado previamente en decembro cun videoclip. O concerto comeza ás 21:15 na Sala Capitol.

Ith presentan o seu segundo disco 'O mínimo que o contén todo'

Xénero: Rock | 1 / 2 / 2018

Ith_minimocontentodo.jpg

Tres anos despois do seu primeiro álbum Forte (2015), a banda de rock de Mesía, Ith, ven de sacar un novo traballo que xa está á venda na Fnac e no Corte Inglés, e tamén pode conseguirse contactando directamente con Ith. Co título O mínimo que o contén todo, os Ith ofrecen seis temas de composición propia, así como un poema musicado do poeta samanense Fiz Vergara Vilariño nun disco gravado, producido e mesturado en Abrigueiro Estudios (Friol - Lugo) por Arturo Vaquero. En O mínimo que o contén todo a banda -Lucía, Miguel, Toxo, Gonzalo e Folgueira- segue a manter o espírito de facer rock galego e en galego, aínda que con novas ideas e sons que a banda quixo deixar plasmados nel. A temática das cancións vai dende a reivindicación social ata o máis puro sentimento e emoción. A primeira data coñecida da xira de presentación deste novo disco será o 17 Marzo, no Pub Óxido de Lalín, e a banda xa ten máis citas para os seguintes meses en outros locais.

Variacións sobre Martín Códax inicia as propostas musicais sobre o Pergamiño Vindel

Xénero: Miscelánea | 31 / 1 / 2018

image not available

Unha reinterpretación das cantigas de Martín Códax a empregar vídeo, son e danza. Esta é a proposta que achegará o trío Ulobit ao Museo do Mar de Galicia este 2 de febreiro. O grupo contará con Ánxela Blanco, a cantante Alba María, a percusionista Lucía Martínez e o clarinetista Fernando Abreu como convidados e iniciará con este proxecto o ciclo Homenaxe ás trobadoras e trobadores do século XXI, co que fechará a exposición sobre o Pergamiño Vindel deste centro. A grande aposta do programa é o concerto O primeiro elepé vigués, que se celebrará o 3 de marzo no Teatro Afundación. Pablo Novoa, Nicolás Pastoriza, Amaro Ferreiro, Rosa Cedrón, Susana Seivane, Wöyza, Iván Ferreiro, Patricia Moon, Eladio Santos, Víctor Coyote e Lucía Fernández participan no espectáculo que presentará Lydia Botana.

Outro que tal baila é o terceiro álbum de Tiruleque

Xénero: Folk | 30 / 1 / 2018

outro_que_tal_baila_tiruleque.jpg

O vindeiro 17 de febreiro chega ás tendas e preséntase ao vivo na Sala Capitol de Compostela Outro que tal baila, terceiro álbum de Tiruleque. Cinco anos depois de Mu!, o grupo lanza dez temas novos nos que continúa a explorar as posibilidades da música de raíz para a festa e o baile. O álbum autoeditado recolle tres temas propios, "nos que se xoga cos límites dos xéneros", segundo explica a presentación do proxecto, canda a "seis versións de temas tradicionais recollidos por investigadores como Pablo Carpintero ou o americano Alan Lomax. Os temas propios son Ribazo de Razo, definida como unha muiñeira contemporánea de corte tradicional; Mazo té, mazo, xota para dúas gaitas e resto de instrumentos, ou Rumbanera, composición a medio camiño entre a rumba e a habanera. Nas versións, destacan temas tradicionais como a Muiñeira dos dous golpes, o Romance dos paragüeiros ou Asubíame de lonxe.

O Esmorga Fest e o Melona avanzan os seus carteis

Xénero: Miscelánea | 29 / 1 / 2018

image not available

Van saíndo novidades sobres os festivais sonoros máis temperáns do ano. Para alén do Festival A Candeloria de Lugo, con cartel fechado e só 500 prazas para acampada interior por vender a pasada semana, as seguintes citas na axenda adiantan os seus carteis. Deste xeito, o Esmorga Fest de Sarria suma a Nudozurdo e Disco Las Palmeras! e fecha un elenco no que conta tamén con WAS (We Are Standard),La Plata, Jardín de la Croix, Mujeres, Cala Vento, Rayotaser, BULTO, Amparito, FAVX, Presumido, KADETTGSI, Pálida, The Handicaps ou Don Gonzalo. Será entre o 2 e o 3 de marzo, e hai aínda entradas dispoñibles.

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer