Ir ao contido directamente.


O festival Sinsal retoma edición de outono en Vigo

Xénero: Alternativa | 21 / 9 / 2018

image not available

O Festival Sinsal SON Estrella Galicia de outono botará a andar en Vigo os días 6 e 7 de outubro retomando así a súa variante outonal engadida agora á súa estabilizada cita na Illa de San Simón en xullo. O Museo do Mar de Galicia será o escenario o sábado 6, mentres que os estaleiros Freire e Cardama, na fachada marítima de Bouzas, acadarán o seu protagonismo o domingo 7. A nova edición combinará concertos de balde e de pago con actividades complementarias gratuítas para toda a familia. O programa ofrece sons de Galicia, Taiwán, Brasil, Islandia ou Andalucía.

Emilio Rúa presenta hoxe novo disco 'Duetos' un traballo de plenitude

Xénero: Cantautor | 21 / 9 / 2018

image not available

O cantautor ourensán Emilio Rúa presenta o seu novo disco, Duetos, hoxe no Museo Centro Gaiás da Cidade da Cultura. Este oitavo álbum de Rúa tivo unhas condicións excepcionais respecto ao resto da súa carreira xa que foi gravado a dúo con dezaseis grandes nomes da música, como Pablo MIlanés, Victor Manuel, La Shica, Javier Álvarez, Rebeca Jimenez, Carmen Paris, Josele Santiago, Rozalén, Carlos Goñi, Vicky Gastelo, Soledad Gimenez, Rosa Cedrón, Javier Ojeda, Mercedes Ferrer, Luis Pastor e Dolo Beltrán. Na presentación do seu oitavo álbum no auditorio da Cidade da Cultura contará coa presenza de Victor Manuel, Rosa Cedrón e Vicky Gastelo. Segundo o autor, este disco é un paso moi importante na súa carreira e tamén para a música galega, "pois leva a artistas moi importantes do panorama estatal e internacional a cantar comigo en galego de forma maioritaria". En palabras do ourensán, este traballo é "un punto e aparte, neste momento no que cumpro a maioría de idade editando discos e compondo cancións". As entradas para o evento, que terá lugar ás 21 horas están á venda en Ticketea desde 6 euros.

Cantos na Maré explora novos públicos na súa reformulación

Xénero: Miscelánea | 20 / 9 / 2018

image not available

Catro días de programación, novos espazos e cambio de datas do inverno para o comezo do outono. A XIV edición do Festival Internacional da Lusofonía Cantos na Maré presentábase esta mañá en Pontevedra a adiantar grande parte do seu cartel. A cidade do Lérez acollerá do 11 ao 14 de outubro vindeiros as actuacións do evento que se desenvolverá en diferentes espazos e contará ademais con proxeccións de cinema, actividades para crianzas ou obradoiros. Teresa Salgueiro, Chico César, Mercedes Peón, as rapeiras lusas Capicúa e Eva RapDiva, xunto coa galega Wöyza; Throes & The Shine, Selma Uamusse, Bia Ferreira, Cesaria Evora Orchestra, o proxecto Coladera do brasileiro Marcos Suzano ou o músico e poeta caboverdiano Mário Lúcio son os primeiros nomes confirmados.

Vigo, Pontevedra e Cangas acollen o VI Festival Vertixe Sonora

Xénero: Clásica/Lírica | 20 / 9 / 2018

image not available

Espellos, cintas, berros e almofadas e choiva un concerto do grupo madrileño Neopercusión abre esta tarde, ás 20.30 horas no Pazo da Cultura de Pontevedra, a sexta xeira do Festival Vertixe Sonora. Ademais da cidade do Lérez, Vigo e Cangas acollerán as actividades desde encontro de música contemporánea, que conta nesta ocasión con nove citas que se desenvolverán ata o vindeiro 5 de novembro. Jean-Étienne Sotty co seu acordeón microtonal, a mestura de música e acrobacias de Ensemble Regards e a compañía Vahram Zayran, a violinista polaca Linad Jankowska, o saxofonista valenciano Ricard Capellino ou a estrea dunha peza de Xacobe Gaspar Grandal da man Thomas Piel son algunhas das propostas do programa. Dentro das actividades formativas desenvolverase de xeito paralelo ao evento o curso de achegamento á música contemporánea Aguzar o oído, diferentes máster class ou unha serie de concertos para escolares.

Resurrection Fest coloca 9.000 abonos para 2019 nunha hora e media

Xénero: Rock | 18 / 9 / 2018

image not available

A capacidade de convocatoria do Resurrection Fest de Viveiro, a cita co rock duro máis multitudinaria do país, segue a sorprendernos ano tras ano. Onte ás 11 da mañá puxéronse á venda os primeiros abonos para a 14ª edición que se celebrará entre o 3 e o 6 de xullo do 2019 e milleiros de persoas lanzáronse xa facerse con elas aos prezos promocionais de saída. En apenas unha hora e media vendéronse máis de 9.000 abonos, 4.500 deles a un prezo inicial de 95 euros e outros tantos a 105 euros. En total case un millón de euros facturados pola organización no que é un importante apoio de confianza á marca Resurrection Fest, toda vez que do cartel artístico apenas se coñecen a día de hoxe cinco nomes do cento que cada ano ofrece o festival lugués. Ante este éxito, un fito na historia do evento, a organización decidiu manter a terceira e actual oferta de abonos, inicialmente 3.000 a prezo de 105 euros, ata o seguinte anuncio de bandas.

Anxo Lorenzo mantén a súa aposta pola fusión acústico-electrónica con 'Vortex'

Xénero: Fusión | 17 / 9 / 2018

anxolorenzo_vortex.jpg

O gaiteiro moañés Anxo Lorenzo ven de presentar esta fin de semana o seu novo traballo discográfico, Vortex, o terceiro en solitario da súa carreira tras deixar a formación viguesa Spiritu 986. O pasado día 15 o Círculo de Arte de Toledo acolleu a primicia de presentación en directo deste disco e onte domingo o moañés levou a súa nova proposta á sala Galileo Galilei de Madrid. Este vindeiro venres poderemos escoitalo xa en Galicia, nunha actuación no teatro Rosalía da Coruña e o vindeiro 29 de setembro estará actuando ante a comunidade exterior, no Centro Galego de Bruxelas.

Fin de verán de festivais co Festival do leite e Rock is Dead

Xénero: Miscelánea | 14 / 9 / 2018

image not available

Nos últimos estertores do verán aínda quedan citas musicais multitudinarias ás que asistir. Esta fin de semana, ademais do WOS Festival que xa leva desde mércores, dan comezo dúas que teñen como común denominador a gratuidade na asistencia. A Ílla das Esculturas de Pontevedra acolle mañá o Festival do Leite, un evento patrocinado pola empresa Deleite, no que toda a oferta musical é de bandas e artistas galegos. No seu cartel con dous escenarios e que cun programa que comeza desde o mediodía, están presentes Ses, Triángulo de Amor Bizarro, The Soul Jacket, Devacas, Gramola Gominola, Bifannah ou Disco las Palmeras!, entre outros. En Compostela o parque de Belvís acollerá tamén este sábado, unha nova edición da “romaría rock” Rock is dead Fest. Igualmente con entrada de balde este evento centrado en diversas variedades do rock and roll, ofrece entre outras as actuacións de Mad Martin Trío, Mojo experience, Riff Raff, Bonobo e outras tres formacións de diferentes cortes.

Unha homenaxe a Aretha Franklin pechará en Nadal o 8º Outono Códax Festival

Xénero: Jazz/Blues | 14 / 9 / 2018

image not available

Hoxe presentouse a oitava edición do Outono Códax Festival de Santiago, unha cita musical que seguie a crecer cada ano e que goza dunha saúde de ferro a xulgar polo feito de que os seus organizadores xa están a pensar na décima edición e que o seu principal patrocinador, Martín Códax, xa aposta por chegar moito máis alá. Así se desprendía das comparecencias hoxe de uns e outros co gallo da presentación na que estaban María Garrido (Bodegas Martín Códax); Fran Villasenín, Martín Calviño e Javier Freire (organización do festival). O vindeiro 19 de outubro abrirase esta quenda da cita outonas co blues, o soul e o Rhythm & Blues, que se prolongará, en datas salteadas ata o 27 de decembro, xa en inverno. Un ano máis co apoio de varios patrocinios privados como as Bodegas Martín Códax e Pousadas de Compostela, o festival ofrece concertos de pago e outros de balde nos que xunta figuras e grupos que están a despuntar no panorama internacional con outro xa consolidados como referencias.

Susana Seivane explora a maternidade en FA

Xénero: Folk | 14 / 9 / 2018

fa_susana_seivane.jpg

Logo da preestrea que celebrou o pasado mes de febreiro cun recital da Coruña, hoxe sae á venda FA, o novo álbum de Susana Seivane logo de oito anos de silencio discográfico. A gaiteira achega doce composicións que presenta como "unha profunda introspección no eido da maternidade, os convencionalismos, a familia e a plenitude persoal". De feito o nome do disco xorde das iniciais dos seus fillos, Fiz e Antón. Segundo adianta a discográfica, "sen perder a súa esencia definitoria, Susana explora novos ritmos imprimindo modernidade na tradición". Papá Pum Pum, "un canto á alegría vital e á supremacía dos pequenos momentos" é o tema de presentación gravado, como o resto do álbum, nos estudios Nakra. Durmíndote, O primeiro baile ou A nana dos bicos son outros dos títulos que xa están dispoñibles en tendas e plataformas dixitais.

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer