Ir ao contido directamente.


Ti estás aquí > Inicio / música en galego

Música en galego

Lamatumbá presenta a reedición de "Lume" despois do seu éxito de vendas

Xénero: Miscelánea | 17 / 2 / 2006 + VIDEO

not_7522.jpg

Vender tres milleiros de discos en oito meses nun mercado como o galego é o equivalente a obter un disco de ouro no mercado do conxunto do Estado. Con esta idea como motivo de celebración os ourensáns Lamatumbá presentaron na tenda de discos Gong de Santiago a reedición do seu disco “Lume (para que saia o sol)” arroupados por representantes da discográfica, Falcatruada, e da distribuidora, Discmedi. Os compoñentes do grupo brindaron con licor café polos seus seguidores e amigos que fixeron isto posible. A reedición inclúe a tradución das súas letras a outras linguas do Estado cun ánimo de proxección exterior no que tamén incidirán actuacións previstas en Andalucía, Cataluña e Euskadi. Os membros do grupo congratúlanse de poder amosar fóra que aquí hai outras propostas musicais ademais das xa coñecidas e consolidadas do folk. Outra das noticias que avanzaron nesta presentación foi a inclusión dun novo tema seu no espazo da TVG Xabarín Club. Un vídeo feito ao estilo Lamatumbá aparecerá agora na oferta musical dese contedor televisivo recuperado, un feito que o grupo celebra “como se nos tiveran posto unha medalla”.

Máis información en Vieiros

O Palacio da Ópera da Coruña acolle a gala de homenaxe a Pucho Boedo que gravará a TVG

Xénero: Pop | 31 / 1 / 2006

not_7415.jpg

Vinte anos despois do pasamento do cantante Pucho Boedo a televisión autonómica vai gravar un programa especial de homenaxe ao artista. O palacio da Ópera da Coruña acollerá o vindeiro domingo 5 de febreiro está gala na que participarán artistas como Miguel Ríos, que foi amigo do cantante, Deluxe, Paco Lodeiro, Uxía Senlle e Nancho Novo. Tamén actuarán as orquestras coas que Boedo cantou, Os Satélites e Os Tamara. A gala estará presentada por Xurxo Souto, eterno reivindicador do cantante do Ventorrillo, e Yolanda Vázquez. A entrada será de balde previa recollida da invitación na oficina do Instituto Municipal A Coruña Espectáculos na Praza de Ourense.

Máis informaciónno sitio de Asociación de Veciños do Ventorrillo sobre Pucho Boedo

Os compositores galegos entran no Macuf nun ciclo

Xénero: Miscelánea | 27 / 1 / 2006

imaxe non dispoñible

A prensa destacaba onte que o Museo de Arte Contemporánea non acudía este ano a ARCO, a feira de galerías, para volcarse en dar a coñecer o museo. Hoxe presenta unha desas actividades que marcan o seu cambio de tendencia. Trátase dun ciclo que pretende recuperar e difundir a obra de compositores galegos. A iniciativa ten este ano un nome propio, o do compositor e director Ángel Barja (Santa Cruz de Terroso, Vilardevós, Ourense, 1938) a quen se lle renderá homenaxe e se lle dedicará un concerto que ten lugar mañá. Colaboran co Macuf neste proxecto a Asociación Galega de Compositores e a delegación provincial de Cultura.

Máis información en La Voz de Galicia e no web do museo

O duodécimo traballo discográfico de A Roda engade as composicións intrumentais ao seu repertorio

Xénero: Folk | 17 / 1 / 2006 + VINCULO

disco_7338.jpg

A piques de cumprir trinta anos dentro do panorama da música popular, A Roda presenta o último proxecto da formación e que suporá o seu duodécimo traballo discográfico. Baixo o título “A roda alalá adorA”, xúntanse doce temas que van desde a música folk-instrumental, ata a máis característica canción tradicional, sen esquecernos da canción autógrafa (espazo no que destacan os temas compostos ad hoc dos diversos lugares da nosa xeografía), e do folclore luso. Baixo o seu título palindrómico o disco encerra unha filosofía especular que mantén nos seus textos entre os que hai un poema do escritor Gonzalo Navaza. Coa incorporación no repertorio do grupo de temas instrumentais A Roda fai deste traballo un punto de inflexión na súa longa traxectoria.

O disco “Cantos na maré” reúne a sete artistas e un grupo coa lusofonía como denominador común

Xénero: Miscelánea | 5 / 1 / 2006

not_7590.jpg

O proxecto “Cantos na maré” xurdiu dun concerto celebrado en agosto de 2003 na pontevedresa Praza da Ferrería e que reuniu en dezaseis temas as voces de diferentes artistas da música en galego e portugués. Xunto aos galegos Xabier Díaz e Uxía, aparecen neste digipack que recolle aquel concerto, o brasileiro Chico César; a portuguesa Filipa Pais; Manecas Costa, de Guinne-Bissau; a mozambicana Astra Harris; o caboverdiano Jon Luz; e o grupo de caboverdianas afincadas en Burela, Batuko Tantaka. O disco está editado baixo o selo Cartafol Editores e conta coa colaboración do Concello de Pontevedra e da Fundación Caixa Galicia, así como da empresa Nordesía nas labores de produción. Os beneficios xerados por esta edición irán destinados ao Instituto Cultural Casa de Beradêro, Catolé do Rocha, Estado da Paraiba, Brasil, para o desenvolvemento humano e estímulo cultural dos pequenos e pequenas desfavorecidos. A institución está promovida por Chico César, que exerceu de director musical no espectáculo que recolle o disco.

Máis información en Vieiros

Mutenrohi e Luvas Verdes presentan novos discos mentres o Xabarín anuncia a súa vindeira escolma de grupos

Xénero: Folk | 21 / 11 / 2005

imaxe non dispoñible

A banda de folk Mutenrohi cumpre dez anos e publica “... e van dez”, un álbum que, ademais de varios dos temas máis coñecidos do grupo, inclúe un DVD no que se pode ver unha actuación en directo. Tamén pola banda folk, o cuarteto tradicional Luvas Verdes debuta con “Fandango desesperado” no campo discográfico. Virándonos cara ao rock, chéganos a nova de que para o Nadal publicarase un novo álbum do Xabarín Club. Ademais do tema “Os colegas de Xabarín”, con letra de Manuel Romón e Julián Hernández, barállanse para o álbum colaboracións coma as de Iván Ferreiro, Xoel Gómez ou Lamatumbá, segundo asegura “El Correo Gallego”.

Máis información sobre o disco de Mutenrohi e o de Luvas Verdes en La Opinión; o novo álbum do Xabarín en La Voz de Galicia e en El Correo Gallego

Luz Casal leva o seu último traballo a América, continente que inspira o novo de Luar na lubre

Xénero: Folk | 31 / 10 / 2005

imaxe non dispoñible

“Saudade” é o novo traballo de Luar na Lubre. Un disco coa que estrean nova cantante, Sara vidal, e que está inspirado na música feita por e para os galegos que viviron na América, tanto os emigrados como os exiliados. E en América estará a cantante de Boimorto, Luz Casal, na que será a xira de presentación do seu último traballo, o dobre álbum “Pequenos, medianos e grandes éxitos”. Un recompilatorio que se remonta a 25 anos atrás, cando comezou a súa carreira en solitario.

Máis información no web de Luar na Lubre e no de Gisaku Luz Casal

Budiño, Seivane e Sondeseu levan os premios La Opinión de folk

Xénero: Folk | 24 / 10 / 2005

imaxe non dispoñible

O pasado venres o mundo folk estaba pendente da Coruña. O xornal “La Opinión” entregaba os seus cuartos premios ás mellores gravacións deste estilo musical do pasado ano. O disco “Zume de terra” de Xosé Manuel Budiño levou o primeiro premio, seguindo de “Mar de Vigo”, da orquestra folk Sondeseu e por “Mares de tempo” de Susana Seivane. Noutro estilo esta fin de semana coñecemos a presenza dun novo galego na prestixiosa Red Bull Music Academy. O picadiscos vigués Mwëslee parte para Seattle, onde, ao longo dos vindeiros dous meses se formará en música electrónica canda a participantes de todo o mundo e coa presenza dos mais reputados nomes internacionais neste campo.

Máis información en La Opinión, no foro de Sinsalaudo.com e na edición de hoxe de Diario de Pontevedra , sobre a presenza galega na Red Bull Academy nos nosos arquivos

Mutenrohi celebra o décimo aniversario cun disco e DVD e Islabikini presenta o seu novo disco en Lugo

Xénero: Folk | 22 / 9 / 2005

imaxe non dispoñible

Comeza o outono musical coa presentación do disco recompilatorio do grupo ourensán Mutenrohi. O disco supón un repaso á historia desta banda con dezaoito temas dos seus dez anos de actividade e inclúe un DVD co seu percorrido musical. A presentación do disco, no Teatro Principal de Ourense, consistirá nunha actuación cuxa recadación irá en beneficio da Asociación Down Ourense. Os que tamén presentan traballo na súa cidade de nacemento son os lugueses Islabikini que actúan este xoves 22 na sala Clavicémbalo presentando Photographs (Falcatruada, 2005) e que ademais participarán no San Froilán co único concerto en solitario dun grupo local nestas festas.

Máis información no sitio de Islabikini
e de Mutenrohi no sitio de Zouma Records

Un tema de Luar na Lubre forma parte do proxecto musical “Love the Earth” da Expo de Aichi

Xénero: Folk | 14 / 7 / 2005

not_6544.jpg

A canción Terra, incluída no disco “XV Aniversario” de Luar na Lubre, foi seleccionada para estar incluída no CD do programa musical preparado pola Exposición Universal de Aichi, en Xapón, que ten como lema “A sabedoría da Natureza”. O grupo galego achega así un tema dos dezasete que compoñen o álbum “Love the Earth” e no que comparte disco con artistas como Loreena McKennitt, Eric Clapton, Youssou N’Dour ou The Corrs, entre outros. O disco inclúe a letra en galego e en xaponés. Os representantes do grupo están en negociacións para levar a Luar na Lubre a actuar proximamente nalgún dos festivais de música celta que se fan anualmente no Xapón.

Máis información no sitio de Luar na Lubre
e no sitio web da EXPO de Aichi

<< Inicio / Anterior . 971 a 977 de 977 .

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer