Ir ao contido directamente.


Ti estás aquí > Inicio / NOTICIA / O mellor da música galega do ano en 51 nomes

OS PREMIOS MARTíN CóDAX DA MúSICA XA TEñEN FINALISTAS DA SúA OITAVA EDICIóN

O mellor da música galega do ano en 51 nomes

MISCELáNEA | outubro 7, 2021

imaxe non dispoñible

As Bodegas Martín Códax, en Cambados, foron o escenario este mércores 6 de outubro do encontro de finalistas dos 8º Premios Martín Códax da Música, organizados por Músicas ao Vivo. No acto déronse a coñecer os nomes das 51 bandas e artistas, tres por categoría, que pasan á recta final desta edición 2021 e dos proxectos finalistas na categoría de Comunicación e Difusión Musical. O domingo 3 de outubro finalizaban as votacións do xurado dos Premios, a partires de agora, do 11 ao 24 de outubro serán as socias e socios de Músicas ao Vivo, as que voten entre os proxectos finalistas, e o 27 de outubro, no Pazo da Cultura de Pontevedra, celebrarase a gala de entrega.

Como cada ano, tanto os proxectos presentados nas 17 categorías como a propia lista de finalistas deixan ver unha radiografía da música en Galicia e do seu estado de saúde, creatividade e competitividade. Tamén foron anunciados os finalistas na categoría de Proxectos de Comunicación e Difusión Musical: o programa de radio O Recanto do Corcovado (Radio Crónica Folk Musical, Radio Municipal de Redondela e CUAC FM), o colectivo Galeguiza-t e a exposición Cantámola en galego, do concello de Pontevedra. "Foron máis de catrocentos os proxectos inscritos nesta oitava edición, algo digno de mención polo difícil momento que o sector viviu e está a vivir nos últimos tempos. Isto demostra a fortaleza e teimosía do noso gremio, malia os paus nas rodas que se nos están a poñer", explicou a presidenta de Músicas ao Vivo, Xiana Lastra na súa intervención cun efusivo agradecemento ás Bodegas Martín Códax e aos patrocinadores institucionais ás bandas inscritas e ao xurado. Este estivo formado pola cantante Carla Green, o músico Pablo Morán, o xornalista musical Carlos Crespo, o músico e programador Pepe Doré e a cantante, pianista e percusionista Diana Tarín.

Proxectos finalistas
A banda da Loba, Belém Tajes e Espiño son os tres finalistas na categoría de Pop Indie; en Rock, Loiros, Soulwide e Moon Cresta, e en Blues, Funk e Soul, Brais Morán, Narci Rodríguez dA Trío e Enxeito. O Metal tamén ten categoría nos Martín Códax da Música con tres finalistas: N.E.O, Doen e Nuada. MJ Pérez, Gustavo Almeida e Tomás Porteiro chegan á recta final en Canción de Autor/a, e Wöyza, Ilmarto e Marcos de la Fuente en Músicas Urbanas. A categoría de Reggae, Ska e Mestizaxe ten como finalistas a Bush Doctors Band, Chow y La Diligente Reggae Band e The Skarnivals; en Eléctronica son Cora Novoa, Allova e Xackal as aspirantes ao premio nesta edición; en Clásica e Contemporánea, Mateo Arnáiz, Alberto Vilas e Fernando Abreu, e en Jazz e Músicas Improvisadas, Javier Constenla Trío, David Regueiro Quartet e María Toro.

A Música Tradicional queda representada con tres finalistas; Xurxo Fernandes & Pedro Lamas, Carapaus e Pelepau. O Folk, con Caamaño & Ameixeiras, Fiandola e Joel Padín, e as Músicas do Mundo con Enclave,DOUS e Lamas/ De Miguel/ Romero. A música dirixida ao público cativo e familiar ten categoría propia nos Premios Martín Códax da Música e en 2021 son Chuches Amil, Concerto Punkinfantil (Brais das Hortas e Peter Punk) e Radio BULEBULE (Paco Nogueiras) os seleccionados para a última fase dos premios. Os tres finalistas na categoría de Orquestras, Grupos e Música de Verbena son Orquestra La Ocaband, Los Camachuelos e Bafana Bafana; no caso dos Coros e Grupos Locais, Coro da Ra, Sisters In The House e Encaixe, e as Bandas de Música Popular están representadas na final coa Banda Unión Musical de Meaño, Banda de Música de Chantada e Banda de Música de Antas de Ulla.

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer