CORREO
RSS
Ti estás aquí > Inicio / Xéneros / Jazz/Blues
Música Jazz/Blues
Pablo Castaño Quartet achégase ás fontes tradicionais desde o jazz con 'A-la-láa'
Xénero: | 25 / 6 / 2018
Músico de enorme experiencia e curtido ao longo de 20 discos nos que interveu na súa carreira, o saxofonista Pablo Castaño formou un cuarteto á volta da súa estadía neoiorquina de 6 anos. É con esta formación, Pablo Castaño Quartet, coa que saca o primeiro disco co seu nome á fronte. A-la-láa (aCentral Folque, 2018) foi gravado por Pablo Barreiro ao vivo durante dúas sesións de improvisación musical en xaneiro de 2018 e masterizado en Nova York polo produtor Kastuhko Naito. Castaño está acompañado na gravación de dous nomes relevantes da escena galega, como son o pianista Yago Vázquez, residente en Nova York, e o batería Iago Fernández. A eles súmase o contrabaixista arxentino Demian Cabaud e a cantante Ugia Pedreira, que está presente en dous dos temas do disco: Alalá do vento e Alalá da estrela e da Lúa. Dez temas conforman este traballo que desde o jazz aproxímase á música tradicional galega toma e como punto de partida os cantos libres como os alalás e as coplas. O álbum parte de fontes históricas como o Cancioneiro Musical de Galicia, de Casto Sampedro, e tamén de recollidas contemporáneas coma o Cancioneiro Popular Galego da etnomusicóloga suíza Dorothé Schubart. O disco xa está dispoñible para a venda e en plataformas dixitais.
O 14º ImaxinaSons presenta programa con gran presenza de jazz americano e galego
Xénero: | 19 / 6 / 2018
O Festival de Jazz de Vigo ImaxinaSons inicia a súa nova etapa baixo a dirección artística dos músicos Yago Vázquez e Felipe Villar e coa presentación onte a cargo do alcalde da cidade Abel Caballero manifestando o obxectivo de "fabricar" nunha década "un certame de ámbito europeo". Así o dixo na presentación da 14ª xeira desta iniciativa cultural que o Concello dota para esta edición con 150.000 euros. O festival, que nas anteriores etapas servía de xa de centro da difusión da creación jazzística europea contemporánea, ofrece este ano un programa máis achegado á fonte americana do jazz. Formacións galegas como Manolo Gutiérrez Trío, The Alley Stompers ou Comando Radar comparten un importante cartel de actuación coas propostas de reputados artistas estadounidenses como o Kenny Garrett Quintet, Charenée Wade, Glenn Zaleski Trío, Kurt Rosenwinkel Caipi Band ou o espectáculo Equality de Drewes, Lee & Hirshfield no peche desta edición. O Concerto de Apertura o próximo venres, 29 de xuño, no Auditorio Municipal vén da man do británico Soweto Kinch en trío, saxofonista, MC e compositor multipremiado que se especializa nun estilo de marca rexistrada de jazz, rap e spoken word, a diferenza de calquera outro intérprete no mundo. O 14 ImaxinaSons contará con 19 formacións e solistas internacionais, nacionais e galegos Os espazos nos que se vai desenvolver esta edición, que tamén ten un importante número de jam sessións, son o Auditorio Municipal de Vigo, A Casa das Artes, o Conservatorio Superior de Música ou lugares ao aire como a rúa Londres ou a Praza da Princesa.
Veteranos artistas da beira do Mississippi no Festival de Jazz e Blues de Pontevedra
Xénero: | 13 / 6 / 2018
A vixésima sexta cita da cidade de Pontevedra co seu afamado festival Internacional de Jazz e Blues xa ten datase programa completo. Entre o luns 16 e o sábado 21 de xullo a nova edición deste evento encherá a capital provincial de música en diversos formatos. Ademais do jazz de rúa en movemento o programa ofrece seis concertos nas prazas e outras tantas jam sessións nocturnas. O Alfonso Calvo Septet, do contrabaixista compostelán Alfonso Calvo, será quen abra o programa o luns 16 na Praza do Teucro. O jazz galego de novo terá nutrida representación no cartel mentres que desde a beira do Mississippi, Memphis e Nova Orleáns, chegan á beira do Lérez dúas das propostas internacionais que suscitarán grande interese nesta edición. O peche corresponderá tamén a un combo internacional de músicos de jazz brasileño. Cada noite a sala A Gramola acollerá unha jam session a partir da medianoite.
Yago Vázquez e Felipe Villar collen a dirección do ImaxinaSons de Vigo
Xénero: | 7 / 6 / 2018
Con 22 días de antelación ao inicio programado, o 29 de xuño, comezan a saberse detalles importantes da que será a décima cuarta edición do Festival de Jazz de Vigo ImaxinaSons. Os músicos Yago Vázquez e Felipe Villar asumen a dirección do evento este ano en substitución da baterista Lucía Martínez, que levou esa responsabilidade durante os dous pasados anos de este evento organizado polo Concello vigués que segundo algunhas fontes ten un orzamento de 150.000 euros. A desvinculación desta música que substituía á súa vez ao pianista Nani García, e ausencia de noticias, ademais dalgunha información aparecida no perfil da rede social Facebook do evento, hoxe borrado, levou aos círculos de opinión e conversa do mundo do jazz a especular tanto coa desaparición do festival como con un cambio radical de modelo. Se desde a súa orixe o ImaxinaSons era un punto de encontro do jazz galego co que se estaba a facer por España e Europa, cualidade que o distinguía, algunhas fontes apuntaban agora a unha conversión que acollería jazz do outro lado do océano. Non hai aínda avances do programa que permitan asegurar ese xiro e único que ata de agora se coñece é a cancelación súbita dunha actuación xa concertada co baterista cubano Michael olivera e o seu grupo. Segundo o propio artista comunicou a través de Facebook, a súa actuación xa estaba pechada para o día 1 de xullo dentro do ImaxinaSons cando comezaron a xurdir problemas co número de músicos que debían acompañalo e despois o Concello cancelou completamente a súa actuación. O medio especializado El Club de Jazz, publicou un texto moi crítico coa situación do festival, ¿Réquiem por Imaxinasons? antes de coñecerse que serían estes dous músicos, Yago Vázquez e Felipe Villar, os que dirixirán esta 14ª edición. O contrabaixista Baldo Martínez, primeiro director artístico do festival, fíxose eco dese pasimista artigo no seu perfil de Facebook chegando a comentar que "Parece que desde Vigo se vuelven a cerrar las ventanas a Europa, cuando fue desde allí desde donde se abrieron". As circunstancias aumentan a expectación ante o programa que presentarán o pianista Yago Vázquez e Felipe Villar, e que segundo as datas oficiais se desenvolverá entre o 29 de xuño e o 4 de xullo.
Nace o Festival Internacional de Jazz de Bueu
Xénero: | 6 / 6 / 2018
O Concello Pontevedrés de Bueu une o seu nome ao dos circuítos de jazz coa presentación do que será o seu primeiro festival internacional deste xénero. A Asociación de Jazz de Bueu corre coa coidada organización do I Festival de Jazz de Bueu que se celebrará do 7 ao 10 de xuño en diversas localizacións da vila morracense. O evento consistirá en diversas actividades, cinco concertos, e dúas jam sessions con horarios que cubren as xornadas desde o mediodía ata a noite. A participación internacional será dun 11%, con músicos de tres nacionalidades, o baterista iraní Shayan Fathi, o baixista holandés Felix Barth e o saxofonista italiano Rosollino Marinello. Outro 11% son de diferentes comunidades da Península, dando especial protagonismo aos músicos galegos, que suporán o 78% dos participantes do festival con nomes que será cabezas do cartel como o guitarrista Virxilio da Silva presentando JUZZ, o novo proxecto musical que lidera. O saxofonista gaditano Antonio Lzina e o seu grupo son outro dos nomes destacados do cartel.
O "...mañá..." máis maduro de Carmen Rey
Xénero: | 14 / 5 / 2018
A cantora coruñesa Carmen Rey , que foi finalista este ano ao premio Martín Códax de Blues, funk e soul, está xa a presentar o seu novo disco, …mañá… (Autoeditado), un traballo que se fixo agardar oito anos despois da publicación do seu anterior disco, Meu(Audia records, 2009) precedido por Fuera(2004). Carmen ofrece neste álbum oito temas orixinais de soul e funk cantados en galego con elegantes arranxos e que nalgúns caso xogan coa improvisación jazzística e mesmo algún arranxo jazz sobre unha peza tradicional como en Porqué non hei. A cantante e compositora considera que este traballo pode diferenciarse dos seus anteriores nunha madurez propia que amosa, "considero que madurei a nivel harmónico sobre todo e melódico e iso nótase moito a diferencia dos discos anteriores", asegura Rey, que opina que o son desta xeira musical resulta "máis complexa e máis rica" que nos discos anteriores. Nestes oito anos entre discos Carmen Rey sempre estivo en actividade e crecemento profesional, compaxinando o seu proxecto persoal co traballo á fronte doutros proxectos como o de ser directora e arranxista do coro feminino de música moderna Sisters in the House (finalista dos premios Martín Códax) e do cuarteto vocal Ejazz (gañadoras do Martín Códax, 2017 na categoría de coros e música vocal). O disco gravouse nos estudios Disquesí da Coruña cun grupo composto por Sergio Delgado, aos teclados, Rubén Appratto no baixo, a guitarra de Tito Calviño e Miguel Cabana na batería. Para o directo presenta tamén un formato en acústico, piano e voz, acompañada aos coros de Angeles Dorrio e Sara Lorenzo.
A Bakin'Blues Band celebra aniversario con 'Ten long years, 2008-2018'
Xénero: | 17 / 4 / 2018
A Bakin'Blues Band está a piques de cumprir dez anos de traxectoria e vaino celebrar por todo o alto. Será este venres 20 de abril cando presente o seu novo disco, Ten long years, nun concerto no Teatro Principal de Santiago de Compostela no que farán un repaso polos temas que levan interpretando nos escenarios desde 2008. No mesmo día estará á venda no propio concerto o disco, terceiro da banda, que inclúe unha escolla de gravacións en directo en Noia, na Sala Capitol e no recente Fisterra Blues Experience. Ten long years é tamén o título do espectáculo co que a banda compostelá de blues pretende recrear este percorrido dunha década. Será un concerto de 2 horas no que intervirá unha banda de 10 músicos, entre membros da Bakin, metais e coros. E a isto haberá que engadirlle convidados que teñen un vínculo especial coa banda. E a festa continuará despois do concerto nunha jam session no Dado Dadá, local fundamental na historia desta banda. Desde a banda efinen este concerto como "un capricho que pretende presentar toda esa experiencia, todos eses encontros, toda esa alegría do blues". A Bakin'Blues Band está formada por Javier Turnes ( voz e guitarra), David Vázquez (guitarra solista), David Prieto (baixo), Alejandro Casquero (teclado), e David Failde (batería).
Primeiro disco de Pablo Sax Trío, 'Amorgana'
Xénero: | 20 / 3 / 2018
Pablo Sax Trío ven de sacar o seu primeiro disco, Amorgana (Autoedición), que inclúe once pezas musicais e unha paisaxe sonora froito do labor compositivo do líder desta formación, o saxofonista e compositor, Pablo “Sax” F. Sinde, nacido en Holanda e residente en Galicia que neste proxecto está acompañado por Pablo Pérez Sanmamed (contrabaixo, oud, arranxos) e Sergio González (batería). Pezas en formato solo, dúo, trío e cuarteto cunha visión moi persoal e estética do jazz contemporáneo. Pablo Sax fuxe das formas canónicas predominantes, sen perder a esencia deste tipo de música, e dando un peso fundamental á improvisación, dende unha perspectiva periférica e libre. Amorgana foi gravado no Laboratorio Soyuz (Trazo) por Hevi, a principios de setembro do 2017 coa colaboración de David Lojo (trompeta e fliscornio). Nesta obra Pablo Sax fai homenaxes a músicos (Anthony Braxton, Steve Lacy, David Bowie), escritores (Juan Goytisolo, Julio Cortázar), amigos (Morgana, Cecilia e Lokis ) e unha peza dedicada ao lugar onde mora (Noia).
Quinito Mourelle presenta hoxe en concerto o disco 'Suite de las ocho'
Xénero: | 14 / 2 / 2018
O Teatro Colón da Coruña acolle hoxe ás 20:30 horas a estrea absoluta de Suite de las ocho, novo traballo de pezas propias do compositor, pianista e xornalista Quinito Mourelle, arranxadas para orquestra de cámara por Roberto Somoza. Este é os segundo disco de Quinito Mourelle. Os oito temas orixinais que se reúnen neste traballo percorren transversalmente a música jazz e a clásica xuntando a sonoridade e a narrativa da música clásica cos valores da improvisación jazzística. A Orquestra de Cámara Galega. Dirixida por Roberto Groba acompaña ao piano de Mourelle e o clarinete de Somoza na posta en escena da suite. O disco gravouse no Auditorio de Galicia en Santiago de Compostela con produción de Pablo Barreiro.
Poderío feminino no novo disco de The Lákazans
Xénero: | 8 / 1 / 2018
O terceiro disco da banda The Lákazans sae hoxe á venda co nome da que foi a "muller máis forte do mundo" a primeiros do século XX, a austríaca Kate Brumbwach coñecida artisticamente como “Sandwina”. O sexteto boirense de blues fai así neste Sandwina (Dotbeat, 2017) unha homenaxe ao poderío feminino a través de esta vienesa que serve de inspiración xa para o tema co que abre o disco, o potente 300 pounds of legend que a modo de anécdota remata cunha improvisación xurdida na propia gravación. Tras o anterior Homegrow (2015) dous anos tardaron en entrar de novo no estudio para plasmar este disco gravado en Pouland Studios, con Iago Pico que co-produciu este disco xunto con Fran Velo e Benjamín Vázquez. Moitas das boas sensacións presentadas naquel traballo vense agora confirmadas e reafirmadas por un son áínda máis seguro e ben asentado.
REPORTAXE
Unha escola de improvisación
Data.O Seminario Permanente de Jazz de Pontevedra tira o seu cuarto disco e consolídase como centro de formación neste estilo musical
