Ir ao contido directamente.


Noticias

O segundo semestre da rede de música ao vivo ofrecerá 136 concertos

Xénero: Miscelánea | 20 / 7 / 2018

imaxe non dispoñible

A Rede Galega de Música ao Vivo (RGMV) inicia hoxe a súa nova programación para o segundo semestre do ano con dous concertos de verán, que terán lugar na sala A Ventana de Laxe, onde actuará o grupo feminino Ejazz ás 23,30 h., e no Náutico do Grove, no que soará o rock hispano dos anos 60 a cargo de Los Mecánicos a partir da medianoite. Este circuíto promovido pola Xunta de Galicia desenvolverá ata finais de decembro 136 novos concertos a cargo de 41 formacións musicais de todos os estilos. A cifra de recitais súmase aos 145 xa realizados antes de xullo, polo que cando remate o ano terase ofrecido un total 281 citas coa música en directo nas 23 salas de 14 localidades que conforman a RGMV á que a Axencia Galega das Industrias Culturais (Agadic) achega 185.000 euros, o que supón o 85% do seu orzamento total e un 105% máis que en 2017. As salas que acollen estás actuacións posúen diferentes tipos de licenzas municipais, non todas elas coinciden coa de sala habilitada para concertos segundo o actual Catálogo de espectáculos públicos e de actividades recreativas e de lecer da Xunta de Galicia o que pode dar lugar a conflitos ante a recente entrada en vigor da nova Lei de Espectáculos de Galicia. Entidades de representación dos músicos e concellos xa pediron ao goberno autonómico a actualización urxente deste catálogo para evitar eses problemas.

No ventre da besta

Xénero: Rock | 19 / 7 / 2018

imaxe non dispoñible

Hai moitos detalles que fan de Resurrection Fest un festival pintoresco. Este ano, ao achegarse calquera que pasease pola Travesía da Mariña ao centro da vila, a música que escoitaba era merengue, cumbia e bachata. Ritmos moi do gusto dos afeccionados ás verbenas que son tan populares nos veráns galegos. E é que o festival é algo tan normalizado en Viveiro que ademais da convivencia dos veciños con rapaces coa cara pintada, tatuaxes tétricas, cadeas e cadeados colgando do pescozo e peiteados extravagantes, como se fose parte da paisaxe máis cotiá dunha vila galega de 15.000 habitantes, o verán transcorre tamén cunha verbena popular, por moito Resu que se celebre.

A programación lírica da Coruña celebrará os 250 anos de ópera na cidade

Xénero: Clásica/Lírica | 18 / 7 / 2018

imaxe non dispoñible

A programación lírica d’A Coruña, que se celebrará entre setembro e novembro servirá para conmemorar os 250 anos da fundación do primeiro teatro de ópera na cidade e o 65 aniversario da creación do Festival de Ópera de A Coruña. A asociación de Amigos de la Ópera celebrará estas efemérides coa programación, por vez primeira na cidade, da ópera Il Pirata de Bellini , unha produción propia que contará coa soprano Saioa Hernández para “rescatar” este título como no seu momento fixera Maria Callas,. Tamén está previsto o Serse de Händel en versión de concerto con Il Pommo D’Oro e o recoñecido contratenor Franco Fagioli. Ademais a soprano Angela Meade, ofrecerá o seu primeiro concerto con orquestra en España, cunha selección do seu repertorio para as vindeiras temporadas e estrearase o primeiro espectáculo sobre a historia musical da cidade, Setaro, el constructor de utopías, que viaxará a Portugal coa Orquestra Barroca de Mateus.A mezzo canadiana Vivica Genaux e o barítono coruñés Borja Quiza serán os protagonistas e o director Mario Pontiggia asinará a posta en escena. Esta obra lembrará ao cantante e emprendedor italiano Nocila Setaro que no ano 1768, obtivo a primeira licenza municipal na Coruña para a actividade dun teatro que se considera a orixe da actividade musical da cidade.

O CourelSon leva o blues e o jazz á serra

Xénero: Jazz/Blues | 17 / 7 / 2018

imaxe non dispoñible

Catro localidades do Courel acollerán unha serie de concertos de Jazz e Blues no que será a primeira edición do CourelSon. Catro concertos ao longo do verán dirixidos tanto á veciñanza coma ó turismo impulsados pola Asociación de Desenvolvemento Rural Serra do Courel. Os concertos, de balde, reúnen a catro propostas musicais dentro destes xéneros e terán lugar á tardiña nas Airas e prazas das distintas localidades caurelás o que permitirá gozar, non só da música senón tamén da contorna. Esta primeira edición do CourelSon comezará o vindeiro 26 de Xullo en Seoane do courel coa actuación da banda madrileña de blues Edu Manazas & Whiskey Tren. O 2 de Agosto, en Seceda*, será o momento do dúo belga Tiny Legs Tim. O cuarteto vigués de jazz FoureJazz estarán no serán do 9 de agosto e Parada de Courel e o ciclo terminará por todo o alto coa actuación de Sumrrá en Paderne o 23 de agosto. * Por cambios de derradeira hora desenvolveráse en FROXÁN a partires das 20:00h.

Peche de carteis nos festivais Revenidas e Noroeste para agosto

Xénero: Miscelánea | 16 / 7 / 2018

imaxe non dispoñible

O festival Revenidas que celebrará a súa 15º edición do 17 ao 19 de agosto, pecha o seu cartel sumando a tres novas bandas, que acompañarán ás xa anunciadas Soziedad Alkoholika, The Real MCKenzies, Balkan Bomba, Ezetaerre, Cuarta Xusta, Glaukoma, NH3, Zoo, Steve 'n' Seagulls, Banda Xangai, Russkaja, The Dawlins, High Paw, Joan Garriga, Keltoi, Xavi Sarrià, Ayax y Prok e Auxili. Deste xeito incorpóranse á festa que a organización ten preparada para o Festival das Linguas a cumbia combativa de Tremenda Jauría, a mestizaxe mediterránea de El Diluvi e a música comprometida e enérxica de Dakidarría. A organización, que non descarta algunha “incorporación sorpesa” durante as próximas semanas, está actualmente artellando unha programación cun potente contido cultural galego que abrangue diversas disciplinas, e sempre vencellado ás tradicións. Ademais, o Revenidas aposta por unha combinación de espazos de balde para o lecer de familias e de todos os públicos.

Charo Pita convídanos a pasear No país do vento

Xénero: Infantil | 16 / 7 / 2018

No-pais-do-vento_charo_pita_capa.jpg

Logo de se estrear con Xoán Curial en Estamos no verán!!, Charo Pita inicia a súa carreira en solitario no campo da música para as crianzas. No país do vento, publicado por Galaxia na editorial Sonárbore achega unha serie de personaxes e de obxectos con cadansúa historia. A científica incorrixible, O pato Simón, As campás ou A familia papaventos danse cita nun libro-CD que conta con ilustracións de Óscar Villán. O proxecto, cun total de trece temas, conta ademais con material extra dispoñible no web de Galaxia.

Tui e Valença homenaxean as mulleres na nova edición do Ikfem

Xénero: Miscelánea | 13 / 7 / 2018

imaxe non dispoñible

Women Sound é o lema co que Tui e Valença celebran entre o 20 e o 24 de xullo vindeiros a nova edición do IKFEM. O International Keyboard Festival & Masterclass celebra un ano máis os instrumentos de teclado a homenaxear as mulleres e cunha atención especial ás persoas afectadas pola explosión de material pirotécnico en Paramos, para quen se recollerán doazóns. Júlio Resende, Najla Shami, António Oliveira, Maria Ana Bobone, Fernando Miguel Jalôto, Rosa Torres-Pardo, Rocío Márquez, Clara Muñiz e, cun recital de pianos a catro mans, Andrea González e Daniel Pereira conforman o programa do evento.

Espazos Sonoros presenta a súa XI edición

Xénero: Antiga | 12 / 7 / 2018

imaxe non dispoñible

O campamento romano de Ciadella, a igrexa de San Xiao de Moraime, a fortaleza da Frouseira, a illa de Sálvora, a Casa Grande de Trasalba, Santa María de Baiona, San Martiño de Mondoñedo ou San Pedro Fiz do Hospital son os espazos que acollerán a XI xeira do ciclo Espazos Sonoros. Os xa habituais concertos de música antiga en espazos de interese patrimonial desenvolveranse este ano as fins de semana de setembro e fecharán o día 7 de outubro. Para alén dos recitais, haberá tamén visitas guiadas e rutas para coñecer os contornos dos lugares.

Pablo Díaz continúa a súa carreira na música infantil e lanza Coas miñas mans

Xénero: Infantil | 11 / 7 / 2018

Coas-minhas-mans_pablo_diaz.jpg

Da man da colección Sonárbore de Galaxia chega ás librarías o quinto traballo de Pablo Díaz. Coas miñas mans é un novo libro-CD, ilustrado desta volta por Lucía Cobo no que o músico se centra nas mans. "Empregamos as mans para comunicarnos, para escribir, para debuxar, para pintar, para contar, para sentir...", explica a presentación do álbum. A partir desta base, o músico desenvolveu cancións didácticas sobre números, vocais, cores ou comidas que alternan con cancións lúdicas sobre a primavera, os xogos, as mascotas ou festas como o San Froilán, ademais dunha adaptación do poema Chove en Galiza de Xosé María Díaz Castro. Un total de quince novos temas "para medrar con alegría".

Culturgal centrará no público a súa undécima edición

Xénero: Miscelánea | 9 / 7 / 2018

imaxe non dispoñible

Ti levas o compás é o lema co que se presentaba esta mañá a undécima edición de Culturgal. A Feira das Industrias Culturais desenvolverase en Pontevedra entre o 30 de novembro e o 2 de decembro coa intención de outorgarlle o protagonismo ao público. A Cidade do Lérez acollía esta mañá a presentación da nova xeira do encontro, que mantén o espazo dedicado á arte contemporánea aberto en 2017. Tal e como se anunciara, Carlos Núñez protagonizará o grande concerto do 1 de decembro, mentres o día 30 haberá unha sesión de artes escénicas a cargo de Inversa Teatro e a súa obra Sofía e as Postsocráticas. O domingo 2 serán o OVIRAVAI e Xoán Curiel os que poñan en escena a música para o público máis cativo. A organización lembra que se abre o prazo para presentar actividades á programación (do 9 de xullo ao 1 de outubro) e reservar postos nesta nova xeira (ata o 15 de novembro).

<< Inicio / Anterior . 11 a 20 de 2335 . Seguinte \ Fin >>

BUSCADOR

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer