Ir ao contido directamente.


Noticias

David Regueiro Trío afonda no jazz Manouche con Areal

Xénero: Jazz/Blues | 9 / 3 / 2020

areal_david_regueiro_trio.jpg

O guitarrista e compositor David Regueiro continúa o seu traballo no ronsel de Django Reinhardt. Desta volta, en formato trío, presenta Areal, un LP no que o o jazz manouche, con influencias de swing americano e be-bop, impregna nove temas de composición propia. Acompañado de Iago Reigosa á guitarra e de Juyma Stévez ao baixo, a formación incorpora colaboracións de Sarunas Pupelis ao clarinete en dous temas e de Ismael Cabaleiro ao violín noutro máis. O proxecto, autoeditado e gravado polo propio Regueiro está a iniciar este mes de marzo a súa xira de presentación. O Garufa Club da Coruña acollerá o vindeiro día 15 a presentación do álbum, e o tour continuará por Vigo (20 de marzo), Compostela (2 de abril), Zaragoza (9 de abril), Barcelona (10 de abril) e Bueu (14 de maio).

Germán Díaz e Tanxugueiras aparecen como favoritos nos Premios Opinión de Música de Raíz

Xénero: Folk | 6 / 3 / 2020

imaxe non dispoñible

O xornal La Opinión publicaba na mañá deste 6 de marzo a listaxe de finalistas para XIX edición dos Premios Opinión de Música de Raíz. Na listaxe destaca a presenza de Germán Díaz, que está presente nas catro categorías dos galardóns. O zanfonista, para alén de optar ao premio ao mellor intérprete, aspira ao de mellor disco polo Trece cancións bonitas que gravou con Benxa Otero, e onde se atopan tanto Es un sombrero, aspirante a mellor tema orixinal, como Alalá de Muxía, candidata á mellor adaptación dunha peza tradicional.

Xico de Carinho presenta 'Na harmónica', o seu primeiro disco en solitario

Xénero: Fusión | 5 / 3 / 2020

imaxe non dispoñible

A Associaçom José Afonso-Galiza e a Gentalha do Pichel de Santiago organizan hoxe un acto de presentación do libro-disco Na harmónica, de Xico de Carinho, editado pola Central Folque. O acto, que contará coa cantautora Alba María ademais do propio Xico de Carinho, será ás 20:30 h. na Gentalha do Pichel (rúa de Santa Clara, 21) en Santiago de Compostela. A entrada é libre. Francisco Peña Villar, Xico de Carinho (Cariño, 1940), é unha personalidade singular, que foi punto de conexión de José Afonso con Galiza desde os anos 70, cando se coñeceron en París, até a homenaxe de 1985 no parque de Castrelos, organizada polas Asociacións Culturais e o xornal A Nosa Terra. No limiar de entrar na súa oitava década, Xico presenta o que é o seu primeiro disco propio, coas constantes do seu repertorio galego e luso-brasileiro orbitando arredor da harmónica, o instrumento máis amado por el. Con este libro disco inaugúrase Zeca, a nova colección de Libros-Cd de aCentral Folque.

MJ Pérez amplía rexistro con A luz prendida

Xénero: Cantautor | 3 / 3 / 2020

luz_prendida_mj_perez.jpg

Un proxecto autoeditado e autoproducido, no que a autora desenvolveu mesmo o deseño gráfico. Esta é a proposta de MJ Pérez para A luz prendida o seu cuarto álbum (segundo de estudio) que saíu á venda este 1 de marzo. A cantautora presenta quince temas nos que amplía o seu rexistro musical a explorar ritmos latinos, toques folk ou orientacións cara á música do mundo, indo para alén do seu pop-rock máis habitual.

Son Trío sacan o seu primeiro disco 'Miña Almiña'

Xénero: Melódica | 2 / 3 / 2020

minha_alminha_SonTrio.jpg

Talvez poñer na rúa un disco completo xa non sexa un requisito fundamental para formar parte da escena musical ao cento por cento, pero facelo aínda ten o seu mérito ademais do seu traballo, por iso a presentación do primeiro disco longo de Son Trío, o álbum Miña almiña (Autoeditado) segue a ser un acontecemento. A Casa de Rosalía, en Padrón, acolleu o momento en que o trío formado por Katerina Linke (piano e composición), Su Garrido Pombo (voz) e Susanna Blanco (cello) amosaba en directo os temas que vertebran este seu disco. O sitio era o máis acaído toda vez que Miña Almiña son 9 cancións con música orixinal e letra de Rosalía de Castro. Melodías intimistas e elegantes, aproveitando os rexistros do cello e o piano para viaxar do jazz á clásica e á música tradicional, sempre en códigos contemporáneos.

Os Premios Martín Códax van pola sétima edición como escaparate de variedade musical galega

Xénero: Miscelánea | 28 / 2 / 2020

imaxe non dispoñible

Cunha festa onde non faltou a música puxéronse en marcha onte oficialmente os Premios Martín Códax da Música na que xa vai ser a súa sétima edición. Estes galardóns anuais promovidos pola Asociación Músicas ao Vivo teñen como obxectivo dar visibilidade e recoñecer a diversidade e a calidade artística das producións musicais e de todo o sector musical galego. Para a presentación oficial acudiron á Sala Sónar de Santiago moitos membros da tribo musical do país e representantes da asociación MAV así como de todas as institucións e empresas que dan o seu apoio a esta iniciativa: Xabier Mera e Xiana Lastra como presidenta de Músicas Ao Vivo, María Garrido como Directora de Marketing de Bodegas Martín Códax, Carmen Fouces, Concelleira de Cultura do Concello de Pontevedra, Jacobo Sutil como Director da AGADIC e Victoria Alonso en representación da Deputación de Pontevedra. Brais Morán acompañado do seu grupo puxo o punto musical ao acto. Como cada ano, a convocatoria inclúe novidades coas que a asociación organizadora quere ir respondendo á realidade da escena musical e axustando os procesos para acadar mellores resultados. Algunhas destas novidades se presentaron onte.

Emilio Rúa presenta en Mondoñedo Novelovento

Xénero: Cantautor | 28 / 2 / 2020

novelovento_emilio_rua.jpg

Ao longo deste venres 28 de febreiro o Concello de Mondoñedo celebra unha homenaxe a Álvaro Cunqueiro. Na mesma, para alén dunha maratón de lectura de Merlín e familia e dunha ofrenda floral, desenvolverase o nomeamento de Víctor F. Freixanes como "Cunqueiriano de honra". No programa inclúese tamén a presentación de Novelovento, novo disco de Emilio Rúa no que o músico adapta catorce poemas que o mindoniense publicou na súa obra Herba aquí ou acolá. O volume, publicado en formato libro-CD ve a luz da man da editorial Galaxia.

Sés amosa boa saúde en 'Liberar as arterias'

Xénero: Cantautor | 21 / 2 / 2020

Ses_liberararterias.jpg

Un poema de Luz Fandiño dá título ao sétimo álbum de María Xosé Silvar "Sés", que hoxe mesmo sae ao mundo da man de Altafonte. Liberar as arterias é tamén a única das doce cancións do disco homónimo cuxa letra non é da propia Sés, no resto dos temas a cantautora asina letras e músicas. Como se agarda dela, Sés, mantén viva e saudable a súa mensaxe de denuncia social ao longo de todo o álbum que, de novo bebe musicalmente do legado dos cantautores latinoamericanos que desde os anos 60 marcaron a historia musical da conflitividade política tanto nos países americanos como na España da ditadura e a transición. Coherente con esta liña que estaba tan presente no anterior Rabia ao silencio(Altafonte, 2019) están cancións como a que dá titulo ou Quen son os meus, O silencio non marcha e Na fronteira, por exemplo. Pero ademais nesta ocasión Sés ofrece ao longo do disco cortes nos que teñen sitio con bo resultado – como xa fixera en anteriores discos- sons do rock máis electrico, o soul, o blues ou o jazz funk coma en Para a curación, Trampa de odio, Mafia, na que semella saldar contas pendentes moi concretas, ou esa contundente Espiña sen rosa no que se declara con forza: "prefiro ser herba mala que camelia pra lucir". As presentacións en directo en na América do Sul xa tiveron lugar durante este mes de febreiro e agora comeza a súa xira peninsular o vindeiro día 28 na sala barcelonesa Luz de Gas. O primeiro concerto en Galicia terá lugar o 6 de marzo no teatro Afundación de Vigo. Na Coruña e Pontevedra tamén hai previstas actuacións.

Esmorga Fest despedirá o inverno cun potente cartel de máis de vinte actuacións

Xénero: Miscelánea | 14 / 2 / 2020

imaxe non dispoñible

A un mes vista do Esmorga Fest o cartel xa anunciado deste evento de Sarria (Lugo) dá para proclamar o festival como unha das máis importantes citas deste tipo no interior galego e fóra da época estival para este 2020. Co cartel aínda sen pechar pero con máis de vinte nomes confirmados para esta edición que terá lugar entre o 13 e o 14 de marzo, nos últimos días do inverno, o festival reunirá nos seus escenarios unha boa representación da música independente e alternativa máis emerxente da escena musical actual. Nomes como Pálida, Moura, Trifulca ou The Fingers dan tamén presenza asegurada de artistas de Galicia nun cartel que conta ademais con bandas como Cariño, Los Punsetes, Viva Belgrado, Pony Bravo e un longo listado ata as 22 propostas que o evento lucense ofrece arestora.

As votacións populares manteñen a máis de vinte artistas galegos semifinalistas nos Premios MIN

Xénero: Miscelánea | 13 / 2 / 2020

imaxe non dispoñible

Ata 22 nomes da escena musical galega obtiveron apoios populares a través das votacións na rede para manterse como semifinalistas nos Premios MIN da música independente española que este ano celebra a súa 12ª edición. Deste xeito músicos e grupos galegos de moi diversos tipos acadan presencia no panorama estatal e a escena musical do país está representada en 9 categorías ademais da propia de Álbum en Galego. Por acumulación os composteláns Novedades Carminha, grazas ao traballo feito no 2019 tras o lanzamento de Ultraligero (Ernie records) son os máis presentes con catro postos de semiginalistas en categorías tan importantes como Mellor Artista, Mellor Directo, Álbum do ano e Mellor álbum Pop. Xustamente nestas dúas últimas categorías, ademais deno Álbum de Músicas do Mundo e Fusión é nas que a música galega ten máis presenza. Tanto Agoraphobia con Unaligned(DotBeat) como Tanxugueiras con Contrapunto (Calaverita Records e PlayPlan) seguen entre os semifinalistas de Mellor Álbum do 2020. Na categoría de discos pop, ademais de Novedades os votos do público serviron para manter vivas as opcións de Guadi Galego co plurilingüe Immersión (Altafonte) e de Presumido co seu Cuatro estaciones (Presumido records). Repiten Tanxugueiras entre os 15 semifinalistas de músicas do mundo e fusión, categoría na que tamén se manteñen Budiño con Fulgor e Najla Shami co disco-libro Ela sabe a sol (Ed. Galaxia).

<< Inicio / Anterior . 11 a 20 de 2769 . Seguinte \ Fin >>

BUSCADOR

 

 

 

Sponsored Links: No Frills Flyer, Freshco Flyer, Food Basics Flyer, Walmart Flyer, Giant Tiger Flyer