Xavier castro coordina estes encontros, que se desenvolven do 25 de abril ao 25 de xuño
Achegarse á creación literaria, artística e musical galega ao tempo que se coñecen os viños do país. Esta é a proposta que fai o historiador Xavier Castro nas Xornadas sobre viño e cultura galega, que se desenvolverán entre Compostela e Vigo do 25 de abril ao 25 de xuño. En cada sesión, cataranse diferentes viños de adegueiros galegos que teñan relación coa vida ou a obra dun persoiro da nosa cultura. Maruja Mallo, Julio Camba, Rosalía de Castro, Valle-Inclán e Álvaro Cunqueiro protagonizan as diferentes xeiras do evento, que tamén contarán con ambientación musical. A inscrición á iniciativa, que conta co apoio da Secretaría Xeral de Cultura, está aberta.
