Un xogo de café en cerámica representando un bosque gaña o Premio de Artesanía

Os galardóns tamén recoñecen a traxectoria do veterano torneiro Manuel Castro das Pontes

Os Premios Artesanía de Galicia 2018, outorgados pola Fundación Pública Artesanía de Galicia, desveláronse esta semana recoñecendo así os traballos máis salientables do sector do deseño e manufacturación galego. Os galardóns contan con tres categorías: Premio Artesanía de Galicia 2018, dotado con 6000 euros; Premio Traxectoria, de carácter honorífico; e Bolsa Eloy Gesto, dotada con 4000 euros para investir en formación especializada nun centro de prestixio. O Premio Artesanía de Galicia 2018, dotado con 6.000 euros, foi para a ceramista Ana Tenorio, do obradoiro Witchneeds store (Vigo), pola súa obra O bosque interior, un xogo de café realizado en cerámica que representa o bosque esencial como tributo á natureza. Todo na obra está estudado, dende o seu deseño e a súa concepción, pasando pola busca e pola utilización de cada material, para destacar a singularidade, e resaltar a beleza e a fraxilidade do bosque. O xurado destacou a calidade do proxecto non só na selección e no acabado dos materiais senón tamén na súa coidada e elegante presentación. Witchneeds é un proxecto nacido no ano 2017. A comezos de 2018 crea tres liñas de investigación e de traballo. Na liña máis experimental das tres e cun carácter máis escultórico, atópase a obra gañadora do premio.

Cristina Velasco, do obradoiro Anaquiños de papel (A Coruña), resultou a gañadora do Premio Bolsa Eloy Gesto 2018, dotado con 4.000 euros para continuar coa súa formación artística e empresarial. No ano 2016, Anaquiños de Papel lanza a súa primeira colección de pantallas de origami chamada Luces do Norte e inspiradas en Galicia. Neste breve espazo de tempo xa teñen colaborado con Loewe, Cartier, Inditex, Cruz Vermella ou Ecoembes. No terceiro dos galardóns, o honorífico Premio Traxectoria, outórgaselle ao torneiro Manuel Castro “Lolo” (As Pontes) pola súa traxectoria profesional a prol da tornería de madeira, así como pola súa contribución á divulgación do oficio a través de charlas e cursos e, especialmente, na súa participación en cada unha das edicións do Encontro Internacional de Torneiros da Madeira, que se celebra en Xermade cada ano dende o 2001. Lolo é un experto no uso da “llerga” unha ferramenta propia da zona que el mesmo segue forxando e que cuxo manexo se dedica a amosar e ensinar a futuros torneiros e interesados.