O Teatro Ensalle de Vigo acolle a estrea desta montaxe
Diego Anido, Borja Fernández, Laura Iturralde e Pablo Rega son os nomes que están detrás do Colectivo Marciano Balboa que este venres se presentará ao público coa súa primeira produción escénica : O Inevitable. A sala viguesa Teatro Ensalle acolle, entre venres e domingo, a estrea e as primeiras representacións deste espectáculo definido como "unha acumulación de escenas baseadas nos efectos secundarios da fe católica, os remakes turkos de Rambo e os momentos mais íntimos da vida dun lobo solitario chamado Antonio, un tipo que fai milagres", segundo o Colectivo. Anido e Fernández corren coa dirección e a interpretación, Iturralde co deseño de iluminación e audiovisuais e o músico Pablo Rega a parte sonora. A produción de O Inevitable participou do programa de residencias Paraíso no Pazo da Cultura de Carballo e o 10 de febreiro estará no Salón Teatro de Compostela dentro da programación do ciclo Escenas do Cambio 2019.
