Quere sentar as bases das políticas teatrais da vindeira década
A Cidade da Cultura acollerá entre o 25 e o 28 de marzo de 2020 o I Congreso Internacional do Teatro Galego, que organiza a Academia Galega de Teatro. A entidade xa anunciara na súa presentación pública en marzo de 2018 a súa vontade de levar a cabo este congreso, involucrando a numerosos axentes do sector. Hoxe no Consello da Cultura Galega detallou os obxectivos, a estrutura básica e o inicio do prazo de envío de comunicacións. Co obxectivo expreso de pensar no futuro do teatro do país para o 2030, a presidenta da Academia, Inma Antonio, sinalou o interese de que o congreso sirva para axudar a crear un plan estratéxico ou "unha lei do teatro" na vindeira década.
O congreso está artellado en tres grandes ámbitos temáticos que se inician con relatorios dos que xa hai nomes confirmados. Deste xeito, "Experiencia, actualizade e modelos externos" abrirase cunha conferencia de Cristina Domínguez, vicedirectora da Escola superior de Arte Dramática de Galicia, "O teatro e os públicos" por parte de Lucina Jiménez López, doutora en Ciencias Antropolóxicas pola Universidade Autónoma Metropolitana de México e "A creación e os seus procesos" será impartida por Lluís Pascual, director de escena e fundador do Teatro Lliure.
