Danza urbana, dos camiños e da memoria nas vindeiras coproducións públicas

Nova Galega de danza, Colectivo Glovo e Elahood sacarán adiante espectáculos en coprodución co Centro Coreográfico

Malia non ter aínda dirección o Centro Coreográfico Galego da Axencia Galega de Industrias Culturais non está paralizado e ven de comunicar as pezas seleccionadas para o seu programa de apoio a producións alleas, toda vez que non se lle espera ningunha propia. Da convocatoria efectuada a este fin o pasado mes de febreiro o departamento da AGADIC seleccionou tres de entre as 18 propostas presentadas. Os espectáculos , da compañía Elahood, Credo, de Nova Galega de Danza, e Tabú, de Colectivo Glovo, foron os elixidos para contar coa coprodución do CCG a través da súa contratación.

A achega prevista para o conxunto dos proxectos ascende a case 54.000 euros, dos que Nó e Tabú recibirán 18.000, o máximo previsto na convocatoria, e Credo, 17.841. Ademais de apoio económico, as compañías disporán das instalacións do CCG, na Coruña, para ensaios e montaxes. Os espectáculos deberán exhibirse nun prazo máximo de 12 meses a partir da formalización do contrato, cun mínimo de dúas representacións, ademais da estrea e das actuacións nalgunha das redes de distribución cultural xestionadas pola Xunta. O obxectivo desta acción, promovida pola Xunta por quinto ano consecutivo a través dunha convocatoria pública, é favorecer a produción de danza en todas as súas modalidades, impulsar a creación de espectadores para esta disciplina escénica, consolidar produtos culturais competitivos que xeren retorno e, en definitiva, a busca da excelencia nos produtos culturais galegos.

Propostas de danza urbana e itinerante
Sobre os espectáculos seleccionados a AGADIC sinala que , de Elahood, é unha proposta de danza urbana con creación contemporánea que centra a súa investigación arredor do concepto do nó, como principio fundamental de coherencia. Este concepto funciona como unha columna vertebral para tecer un conxunto de escenas e atmosferas, nunha viaxe que explora os diferentes espazos que ocupan os nós na nosa realidade. Julia Laport e Sabela Domínguez interpretan a peza, da que tamén son responsables da dirección e da coreografía, xunto a Aina Lanas e Kenrick Sandy. A iluminación está a cargo de Afonso Castro.

Pola súa banda, o proxecto de Nova Galega de Danza, Credo, é unha peza concibida para a súa representación en espazos naturais do territorio galego, concretamente nos cruces de camiños, sinalados cos cruceiros que salpican a paisaxe de Galicia. Trátase dunha viaxe interior que toma a poética de Celso Emilio Ferreiro como referente artístico e conceptual, e que quere representar a andaina vital do ser humano a través do movemento, a exploración e a posta en dúbida de un mesmo e da realidade. Con dirección artística de Jaime Pablo Díaz e coreografía de Fabián Thomé, será interpretada por Inés Vieites, Estefanía Gómez, Uxía Rivas, Pablo Sánchez, Iván Villar e Ricardo Fernández. Sergio Moure de Oteyza é o responsable da composición musical e Xan Domínguez e Fernando Ontañón, dos textos e a dramaturxia.

Nunha dinámica diferente preséntasenos a proposta do Colectivo Glovo. Tabú parte da memoria desde o punto de vista histórico, social e costumista da realidade galega dos anos 20 do pasado século. O proxecto inspírase nunha fotografía pertencente ao Arquivo de Allariz, na que un grupo de mulleres vestidas coas camisolas de dous equipos de fútbol pertencen en realidade a unha comparsa de Entroido de 1925. Así, o espectáculo parte das testemuñas de parentes das mulleres da imaxe e do Entroido como eixes co obxectivo de amosar a fortaleza, a emancipación e a aparencia como posibilidade de futuro. Esther Latorre e Hugo Pereira dirixen a peza, que tamén interpretarán xunto a Sybila Gutiérrez, Clara Ferrao e Fran Martínez. Pedro Fresneda estará a cargo da iluminación e Lucila Celano, do espazo sonoro.