Novas | 1 a 10 de 4022

Siguiente >>

22/02/2024
Setenta e cinco títulos no catálogo promocional Films from Galicia 2024

Como xa é habitual no calendario audiovisual, a Xunta comeza no European Film Market de Berlín, o mercado paralelo á Berlinale, a promoción do novo catálogo Films from Galicia de 2024, integrado nesta edición por 75 títulos galegos para cine e televisión. Clasificadas en longametraxes cinematográficas de ficción, documentais, animación e televisión, 34 das producións xa están rematadas e as 41 restantes están ultimando a fase final para a chegada ás pantallas. A selección de Films from Galicia compleméntase coas curtametraxes que integran Shorts from Galicia, que xa foi publicado baixo a súa propia marca a comezos deste mes de febreiro canda á celebración do Festival de Clermont-Ferrand (Francia). Ambas escolmas forman parte do programa de internacionalización do noso audiovisual que desenvolve o Goberno galego dentro Plan Xeración Cultura, e serán promovidas ao longo do ano nos principais mercados e feiras internacionais de referencia.. Amplía a nova>>

19/02/2024
A canles OU Ké! e Recuncho Gamer impóñense nos Premios Youtubeiras

A gala que os Premios Youtubeiras celebraron en Santiago de Compostela este sábado deixou un palmarés encabezado por OU Ké!, que se fixo co premio á mellor canle nesta edición do certame de vídeos en galego. O xurado recoñeceu deste proxecto a "súa profesionalidade, a súa calidade técnica e o seu coidado na estética", así como o seu "impacto" e mais a "integración entre os medios de comunicación" e "a súa pluralidade".. Amplía a nova>>

16/02/2024
A Agadic incrementa as axudas para a comercialización de obras audiovisuais e videoxogos

Cuns fondos de 70.000 euros, a Axencia Galega das Industrias Culturais convoca no Diario Oficial de Galicia deste 16 de febreiro as subvencións para a comercialización e difusión de proxectos e obras audiovisuais e videoxogos en foros de negocio especializados e eventos de cine.. Amplía a nova>>

16/02/2024
A Xunta amplía a súa colaboración coa Federación de Cineclubs

A Axencia Galega das Industrias Culturais achegará un total de 65.000 euros, 35.000 máis que en 2023, á Federación de Cineclubs para que este colectivo manteña o seu programa. Un total de 19 ciclos e sete semanas de cinema en catorce localidades de todo o país, unha máis do que no ano pasado, desenvolveranse con este apoio, en virtude do acordo que asinaban este 15 de febreiro representantes das dúas entidades.. Amplía a nova>>

15/02/2024
Desembarco de cine en galego no Festival de Málaga

A 27ª edición do Festival de Málaga (1 a 10 de marzo) contará con ata sete producións rodadas en galego no orixinal e outras dúas cintas de produción galega rodadas en castelán. A estrea mundial do filme 'As neves' (Aquí y Allí Films, Cósmica Producións) da realizadora Sonia Méndez será o que poña a produción galega na sección oficial de longametraxes de ficción do festival malagueño. É na sección oficial de xénero documental onde poderán verse máis películas galegas. Será o caso das estreas das dúas longametraxes 'Aurora' (Gaitafilmes) primeiro filme de Area Erina, que se filmou durante máis de 10 anos, e 'Salvaxe, salvaxe' (Walkie Talkie Films) debut na longametraxe de Emilio Fonseca. Xa no formato curto de documentais Málaga acollerá á estrea do novo traballo de Xacio Baño, 'Platónico, platónica' e máis o debut de dous realizadores novos, Paula Fuentes, Guillermo Carrera, presentando 'Corre o vento'.. Amplía a nova>>

14/02/2024
Un informe apoia a rendibilidade económica do HUB audiovisual da Xunta

A Facultade de Ciencias Económicas e Empresariais da USC acolleu onte a presentación do informe de resultados económicos do Hub Audiovisual - Industria Cultural Galega, deseñado e desenvolvido pola Xunta no trienio 2021-2023. O secretario xeral da Consellería de Cultura, Educación, FP e Universidades, Manuel Vila e o director da Axencia Galega das Industrias Culturais, Jacobo Sutil, asistiron á presentación deste informe encargado ao grupo de investigación Posmark (Persoas, Organizacións Sostibles e Márketing) da USC, que integran María Bastida, Miguel Á. Vázquez Taín e Marisa del Río, os mesmo que recentemente presentaron un informe semellante es específico sobre a industria musical galega. O informe reflicte que o Hub, dotado con 9,6 millóns de euros, propiciou a mobilización de 28,5 millóns en dous ámbitos de actuación principais polo seu maior potencial tractor: o audiovisual e a música. Engadiuse tamén un eido transversal, destinado á adquisición de activos e materiais tecnolóxicos por parte de empresas e entidades culturais.. Amplía a nova>>

14/02/2024
Youtubeiras desvelará este 17 de febreiro o seu palmarés de 2023

Nuria Vil e Gabri Fuentes conducen este sábado 17 de febreiro a partir das 20 horas a gala de entrega dos Premios Youtubeiras 2023. O Teatro Principal de Santiago acolle este encontro no que se darán a coñecer os proxectos gañadores da nova edición do certame de vídeos en galego na rede. Mondra porá a actuación musical dunha cita que quere "reivindicar o galego como un fogar integrador e diverso para a comunidade creadora de contidos na Rede".. Amplía a nova>>

13/02/2024
Eva Veiga recibirá o Premio de Honra Fernando Rey

A Academia Galega do Audiovisual anunciaba na mañá deste 13 de febreiro o fallo do Premio de Honra Fernando Rey, que outorga no marco dos Premios Mestre Mateo. A entidade acordou recoñecer nesta ocasión a xornalista, poeta e actriz Eva Veiga, a que considera un exemplo de "profesionalidade, creatividade e resiliencia" que fixo parte da xeración que botou a andar "unha televisión pública comprometida coa información, a divulgación e a construción da identidade de varias xeracións de galegas e galegos".. Amplía a nova>>

13/02/2024
Falece o Padre Xesús Mato aos 91 anos

O martes de Entroido comeza coa mala noticia do falecemento de Xesús Mato, o 'Padre Mato', aos 91 anos de idade. O xornal El Progreso de Lugo daba a coñecer hoxe a noticia do pasamento deste relixioso cuxa intervención cultural tivo un forte impacto nos transcendentais anos 70. Musicólogo e escritor, o sacerdote foi o impulsor dunha das iniciativas máis lonxevas e importantes para a cultura musical tradicional e para a nosa lingua: a formación Fuxan os Ventos. Mato, como director do coro do Seminario Menor Santísimo Sacramento de Lugo, reuniu en 1972 unha formación que baixo o nome inicial de Folk 72 participaron e gañaron o certame musical do IIIº Festival das San Lucas en Mondoñedo. A canción coa que acadaron o premio foi "Fuxan os ventos", unha composición orixinal acorde á canción folk protesta que estaba verse en moitas partes do Estado naquel momento e cuxa letra tiña un importante cariz reivindicativo da cultura propia galega: "Queremos cantar, queremos berrar, coa forza da fe, que a nosa Galicia, aínda está de pe". O tema estaba asinado por J. Cabodevila, pseudónimo escollido polo Padre Mato, natural de Cabo de Vila (Paradela), a el débese o inicio e posta en marcha daquela formación que tomaría o nome da súa primeira canción e que recentemente celebrou o seu 50 aniversario. Xustamente, cando en 2022 algúns dos membros orixinais de Fuxan os Ventos acudiron a recoller o premio de honra dos galardóns Martín Códax da música galega o seu agradecemento principal foi para o Padre Mato, recoñecendo nel as orixes impulsoras do proxecto e da súa razón de ser naquel intre. . Amplía a nova>>

12/02/2024
Janet Novás sitúa 'O Corno' no palmarés dos Premios Goya

Dous dos premios Goya da cinematografía española outorgados este ano ocuparan espazo en andeis galegos. Cumpríronse as predicións respecto ao recoñecemento ao traballo de Janet Novás en 'O Corno' e a intérprete recolleu o Goya a actriz revelación polo seu debut cinematográfico e como protagonista no filme dirixido por Jaione Camborda. Novás (O Porriño, 1942) ten xa unha dilatada traxectoria como bailarina e coreógrafa non exenta de galardóns de alcance nacional. A súa participación como actriz con papel protagonista neste filme supuxo o seu debut cinematográfico e recibiu en todas partes moi boas críticas. A súa presenza continua na narración deita nela unha importante responsabilidade no éxito da película, o primeiro filme rodado en galego que acadou a Cuncha de Ouro do festival internacional de Cine de San Sebastián. Polo seu papel a actriz é finalista tamén na vindeira edición dos Premios Mestre Mateo do audiovisual de Galicia.. Amplía a nova>>

Siguiente >>

Noticias|Reportaxes|Historia|Documentos|Certames|Boletíns|Como estar en AVG |Vantaxes de AVG |Avísanos

AVG | O soportal do audiovisual galego | culturagalega.org


Consello da Cultura Galega
Pazo de Raxoi, 2 andar. 15704 Santiago de Compostela (Galicia)
Tfno: 981957202 / Fax : 981957205 / e-mail: redaccion@culturagalega.org