Que na Arca ía todo canto hoxe podes ver
- ¿e a Quimera?
tamén o leopardo de moitas azas
e as árbores frolidas
-¿e cantabas?
cantaban as olas á fertilidade, amparando os ceos
nas tellas, nos tellados
cantaba Delfina Eydé apañando o corvo no centeo
cantaba co abrigo novo, pelando améndoas, sachando nas cebolas
-¿e Elías?
-cantaba Elías
"eu estaba na casa de Laro, e vinos, aos atracadores
e detrás íalles a Garda Civil, e eles abriron as gabardinas
sacaronlles de metralleta e
tracatracatrá tracatracatrá"
e a Esfinxe recitaba enigmas e violaba aos mozos agonizantes,
antes hipnotizábaos
e estaba Helena, a destructora de naos
e Penelopea
e unha muller que dicía ser provedora de lunares azuis da raíña das illas de
Derek Walcott
e unha anciá, moi minguadiña
e esta estaba dentro dunha botella, e tiña un xardín, moi en desorde
e nas árbores, pendurados de pinzas da roupa de plástico, translúcidas, os
oráculos
e dicía que cada quen collese o seu
que ela xa non atendía
e ao seu carón medraba a mandrágora e o fiúncho
e unha ponla dourada
e alí era a Boca
a Furna dos Avernos
e tiña un galo
vestido de militar
e o galo dicía
-quero.............
.....................................................................................
-¿e había Circo?
.....................................................
que todo é na Burata dos Infernos
-había

[A Ponte das poldras.
Santiago: Noitarega, 1987]

Fascinio. Muros: Toxosoutos, 1995

[Fascinio.
Muros: Toxosoutos, 1995]