En 1954 o galeguismo interior e o galeguismo republicano no exilio mobilizan os seus efectivos para protestar diante das institucións internacionais pola situación da lingua galega no réxime de Franco. A acción diríxese fundamentalmente á UNESCO, que daquela reuníase na cidade de Montevideo e, por primeira vez, aceptaba a presencia nos seus escanos do réxime franquista. O profesor Alonso Montero estudiou o tema no seu último libro "A batalla de Montevideo", (Xerais, 2003) . Arredor deste capítulo da nosa historia contemporánea reuníronse historiadores e especialistas na Tertulia mensual da Sección de Literatura e Industrias da Edición do Consello da Cultura Galega. O encontro foi gravado o xoves 4 ás 17:00 horas na Biblioteca do Consello da Cultura Galega no Pazo de Raxoi. O debate estivo moderado por Víctor Freixanes, e nel participaron Manuel Bragado, editor, o escritor e profesor Gonzalo Navaza, Dolores Vilavedra, Isaac Díaz Pardo e Luís G. Tosar, entre outros. Gravación: Adrián Mourelle