Ir ao contido directamente.


Ti estás aquí > Inicio / música en galego

Música en galego

Pauliña aposta polo idioma con perspectiva punk no seu cuarto disco

Xénero: Fusión | 11 / 4 / 2024

Paulinha_Galegoisnotdead.jpg

Oito temas rápidos e metralladores, cada un no seu estilo e coa súa mensaxe conforman o novo traballo longo de Paula Chaves, coñecida artísticamente como Pauliña, 'Galego is not dead' (Xonix Records), un título e unha portada con referencias punks dos Exploited, os Sex Pistols confirmadas na letra do tema 'Crime e castigo' e outras que teñen que ver máis con The Clash noutros temas. O cuarto traballo da artista chega tres anos despois do seu anterior traballo longo 'Testemuñas' (Xonix records, 2021), tempo no que co seu proxecto estivo moi presente en festivais e dando concertos por toda a xeografía. De novo para a composición Pauliña conta con Paco Montoto e Lolo Arincón, membros fixos da súa banda. Eles asinan sete dos temas con ela, agás o que pecha o disco 'Detective Conan' versión dunha canción do ánime xaponés do mesmo título. O repertorio do novo traballo inclúe as sonoridades entre o rock and roll, o ska e outras mesturas que son habituais nos discos da de Cambados. As letras sempre afiadas, rápidas e contundentes serven para explorar as posibilidades da voz da artista. O álbum está xa dispoñible nas plataformas dixitais.

Embaixada da musica galega en Lorient

Xénero: Folk | 10 / 4 / 2024

imaxe non dispoñible

"A mocidade dos países celtas" é o lema arredor do que se constrúe este 2024 o festival Intercéltico de Lorient, na Bretaña francesa. A súa edición número 53 comezará o 10 de agosto e ata o día 18 reunirá na cidade bretoa un compendio de músicas dos países e as culturas unidas pola identidade celta. A representación da música galega correrá a cargo de diferentes artistas e proxectos que van desde as formacións de corte máis tradicional eos artistas consolidados ata as novas promesas e interpretacións máis avanzadas. Neste caso a lista está encabezada por Carlos Núñez, ben coñecido nesas terras bretoas, que acudirá a Lorient a presentar o seu novo disco e espectáculo 'Celtic Sea'. No programa estarán tamén as agrupación tradicionais Rebulir de Ramirás en Ourense e Banda de gaitas Arume de Malvas, en Tui, así como a proposta contemporánea do trío Caldo. Como é habitual algúins dos músicos máis prometedores da gaita estarán nesta cita que reúne a especialistas de todo o mundo nese instrumento. Por Lorient pasarán Manu Seoane, María López e Pablo Seoane. Tamén estará representada a puxanza das cantareiras e a pandeireta, grazas a Laura Iglesias Buján, que participará do Interceltique Music Camp, durante o festival.

O Galegote volve aos bares e inclúe artistas portugueses

Xénero: Miscelánea | 9 / 4 / 2024

imaxe non dispoñible

O 27 de abril terá lugar unha nova edición do Galegote (anteriormente Galegote Rock) en Pontevedra, o festival que reúne unha selección da ampla oferta da escena musical en lingua galega. A cita, promovida polo Servizo de Normalización Lingüística do Concello de Pontevedra, presenta algunhas novidades nesta edición número 12, ademais da simplificación do seu nome. Unha das novidades máis importante é o feito de que recupera os bares como escenarios principais e ofrecerá neles 14 actuacións repartidas durante o día nos seguintes establecementos: O Diaño, Tabula Rasa, Nasa, La Hormiga, La Pomada, O Grifón, O’Panderetas, La Verbena, Chirala, The Groove House e Sopa de Gallo. Outra da novidades é á incorporación de música do veciño portugal, na súa lingua propia. Así o cartel do festival, que non renuncia ao xénero do rock aínda que é máis amplo, agrupa bandas galegas con traxectoria, voces emerxentes e representación local, con nomes coma Moura, Lacón sen Jrelos, Ataque Escampe, Caldo, Hydn ou Zeltia Irevire, ente outros, e inclúe ademais dúas presenzas lusas: Duques do Precariado e compositora Érika Machado. Entre todos conforman o programa desta xornada festiva e musical, que contará tamén con programación infantil, da man de Cora Velasco e Sandra Asín. Todas as actuacións teñen entrada libre e de balde.

Boyanka Kostova propoñen unha 'Foliada no Inferno'

Xénero: Hip-Hop | 4 / 4 / 2024

BK_foliadanoinferno.jpg

Os Boyanka Kostova (Chicho e Cibrán) xa teñen desde hoxe o seu propio álbum de referencia infernal como todos os grupos de culto desde finais dos anos setenta. 'Foliada no Inferno' (Ernie records, 2024) é o sexto disco longo deste dúo que é bandeira do novo rap en galego. O disco preséntase como "un tratado de 'escarnio e maldizer'", nel, O Chicho do Funk (Ortiga) e Cibrán García maldín todos os males do seu tempo: as relacións sociais, as drogas, o desamor... Pero isto sempre dende o escarnio, mantendo o seu característico toque de humor retranqueiro nas súas letras. Fai menos dun ano que publicaban o seu anterior LP ' Os meus peidos cheiran a pétalos perfumados? (Ernie Records, 2023) co que aínda poden gañar nuns días o Premio Min a Mellor Álbum en Galego e agora suman esta referencia, afastada no son da anterior, cun resultado moito máis ecléctico e nun traballo máis longo (11 temas fronte aos 10 do anterior) e que xa desde a portada representa unha antítese co do ano pasado.

Mundo Prestigio presenta o froito da súa 'Eterna Constanza'

Xénero: Fusión | 1 / 4 / 2024

eternaconstanza_mundoprestigio.jpg

'Ruada' é título do tema co que Mundo Prestigio abre o que é o seu primeiro traballo longo 'Eterna Constanza' (Ernie Records, 2024). Para este tema en concreto a banda conta coa colaboración doutro dos artistas da discográfica, Carlangas. Xustamente esta formación, baixo o nome de Los Cubatas son os que acompañan en xira ao ex-Novedades Carminha. Mundo Prestigio está integrado por Ju, Brais, Fiz e Fer, en 'Eterna Constanza' preséntanse con 13 cancións, pasaxes a modo de interludio e colaboracións con seis dos seus artistas favoritos do panorama musical nacional, ademais de Carlangas conforman esta lista Antía Van Weill, Kimberley Tell, Kiliki Frexko (de Chill Mafia), Erik Urano e Cibrán (Boyanka Kostova), que é practicamente un quinto membro do clan. Para a produción do disco a banda contou coa experta man do coñecido Hevi, unha figura esencial para entender o panorama da música actual en galego. O disco presenta un compendio estilístico variado e un equilibrio entre temas instrumentais, moi ambientais nun senso chill out e outros cantados grazas maiormente á colaboracións.

Cemento Musgo debuta cun visuálbum pioneiro

Xénero: Hip-Hop | 25 / 3 / 2024

Cemento-Musgo-PORTADA-en-baixa-1320x1320.jpg

Once cancións acompañadas doutros tantos vídeos compoñen o visuálbum co que se presenta Cemento Musgo. Neste formato pioneiro no noso país combínanse as artes de Sokram, voz de Dios ke te Crew, ilustrador e muralista, do produtor parisino Coio, que corre coa parte musical do proxecto, e mais do artista visual A.L. Crego, pioneiro do gif art, que achega o aspecto gráfico. O álbum foi gravado, mesturado e masterizado por Møu, de Dios ke te Crew, en Rapapoulo Estudio.

Tanxugueiras e Fillas de Cassandra finalistas en catro categorías dos Premios MIN

Xénero: Miscelánea | 21 / 3 / 2024

imaxe non dispoñible

Pasadas as fases de votación do público e do xurado profesional os XVI Premios Min da música independente española presentaron onte a lista de finalistas de cada categoría, xa con vistas a resolverse o vindeiro 17 de abril na gala de entrega de galardóns. Cinco proxectos musicais compoñen esta lista final de cada premio e ata doce nomes proveñen da escena musical galega. No caso do premio ao Mellor Álbum en Galego os candidatos que poden levar o premio deste ano son Grande Amore, por II (Ernie Records); Fillas de Cassandra, por Acrópole (Tremendo Audiovisual); Caamaño & Ameixeiras, por 'Quitar o aire' (Raso estudios); Ortiga, por 'Ortiga e Pili Pampín' (Ernie Records) e Boyanka Kostova, por ' Os meus peidos cheiran a pétalos perfumados' (Ernie Records). A categoría está claramente dominada por apostas que transitan entre a música urbana e a tradicional, con tres referencias da discográfica Ernie records e unha duplicidade por parte de 'Chicho do funk', presente a través do seu proxecto Ortiga e tamén como metade do dúo Boyanka Kostova. Ademais diso, esta é unha das dúas categorías onde compiten entre si Fillas de Cassandra e Caaamaño & Ameixeiras, que tamén son finalistas a Mellor Álbum de Música de Raíz. En concreto, o proxecto de Fillas de Cassandra xunto co das Tanxugueiras, son as representacións da escena galega máis presentes nestas candidaturas finalistas dos Premios MIN, aspirando a levara ata catro galardóns.

The Rapants poñen en marcha 'La máquina del buen rollo'

Xénero: Pop | 15 / 3 / 2024

therapants_lamaquina_capa.jpg

Os muradáns The Rapants son hoxe en día unha das bandas máis presentes da escena galega do pop, desde que en 2021 gañaron o concurso de bandas emerxentes Sonidos Mans Salas a formación non fixo máis que aumentar a súa presenza e alcance en salas e festivais. Agora presentan o seu terceiro traballo longo, 'La máquina del buen rollo', apenas un ano máis tarde que o anterior 'O Corasón como un after'(2023). Con este novo disco a formación quere amosar unha evolución do seu son e un retrato sonoro o máis fiel posible ao espírito da banda. Nove temas cheos de enerxia para desfogar bailando, ateigado, segundo eles, de chiscadelas á vida muradá e con moitas referencias case universais dentro do mundo do pop. Rock, rap ou country son algúns dos estilos polos que transita este 'La máquina del buen rollo', un traballo que os rapantes gravaron o pasado outono nos estudios de Paco Loco, quen axudou á banda a ultimar os detalles dun disco no que cada tema "ten entidade propia". Cada corte ten características propias, mais todos son parte dun mecanismo que fai que o álbum procure reproducir os directos de The Rapants. The Rapants contrapón letras tristes e escuras (nas que contaron coa colaboración de Sara Faro, de Fillas de Cassandra, para Rue Franklin, e Nuno Pico, de Grande Amore, en Cando Pensa en Min) con ritmos e melodías animadas, feitas para bailar.

A novena xeira de De lugares e órganos activa o patrimonio sonoro de Compostela

Xénero: Antiga | 15 / 3 / 2024

imaxe non dispoñible

Cicno concertos ao vivo compoñen o eixe do programa da novena edición de De lugares e órganos. A iniciativa que pon en valor o patrimonio organístico de Santiago de Compostela desenvólvese entre o 21 e o 31 de marzo a contar cos instrumentos conservados nas igrexas de San Paio de Antealtares, Santa Clara, a capela das Ánimas, a igrexa de San Miguel dos Agros e a igrexa da Universidade.

Milladoiro celebra o 45 aniversario do seu primeiro concerto na Coruña

Xénero: Folk | 13 / 3 / 2024

imaxe non dispoñible

O 15 de maio de 1979 no teatro do colexio Salesianos da Coruña unha nova formación de música folk subía ao escenario a estrearse ante o público baixo o nome Milladoiro. Co tempo esta formación chegou a acadar grande popularidade alcance así como fitos enormes para a cultura galega. Percorreu escenarios de todo o mundo e recibiu recoñecementos senlleiros como a Medalla de Ouro de Galicia (2012), Medalla Castelao da Xunta de Galicia (2004); o premio Goya á mellor banda sonora orixinal, por "La Mitad del Cielo" en 1986; o premio da Música concedido pola SGAE e AIE ou o Pedrón de Ouro, concedido polo Padroado Rosalía de Castro no ano 1985. Agora, 45 anos despois daquel concerto de presentación organizado polo Ateneo herculino e co gallo de conmemorar esa efeméride, a senlleira banda volve subir ao escenario no Pazo da Cultura da cidade que a viu nacer para ofrecer un evento singular coa súa actual formación na que están Xosé V. Ferreirós, Nando Casal, Moncho García, Harry.c, Manú Conde e Manuel Riveiro. Será o vindeiro 19 de maio cando Milladoiro celebre o seu concerto de 45 aniversario e xa está á venda as entradas para asistir.

. 1 a 10 de 1381 . Seguinte \ Fin >>