O Padroado do Museo de Arte Contemporánea de Vigo (MARCO) recibiu onte a proposta do Concello para a programación do espazo de cara ao vindeiro ano e medio. Segundo recollen hoxe Faro de Vigo e Atlántico Diario, a intención do consistorio é abrir o programa este mes de febreiro coa exposición Metrópole. Perspetiva urbana da arte galega, comisariada por Rubén Martínez Alonso e que recolle unha selección de traballos de diferentes autores do país coa cidade como protagonista. A esta seguirá a xa anunciada exposición da Fundación Telefónica sobre Xulio Verne.
Entre setembro e decembro presentarase Pantoque, unha interpretación do traballo nos estaleiros a cargo de Ramón Trigo, Eduardo Armada e Alfonso Armada, á que sucederá unha retrospectiva de Manuel Colmeiro artellada en base aos fondos que a familia do pintor lle cedeu ao Concello de Vigo canda aos que xa eran propiedade municipal.
