As residencias Atopémonos Bailando achegarán a danza á cidade de Lugo

Este catro de marzo abría o prazo de presentación de propostas á primeira xeira das residencias artísticas Atopémonos Bailando. O Colectivo Glovo, en colaboración co Concello de Lugo e da Agadic está detrás desta convocatoria, que prevé a realización de seis residencias artísticas ou de investigación no campo da danza e das artes do movemento na cidade.

A convocatoria, aberta a compañías de España e Portugal, prestará "especial atención ás creadoras de Galicia" cunha reserva da metade das prazas. As actividades están destinadas a "artistas individuais ou equipos que fundamenten o seu traballo artístico arredor do movemento e o corpo", e desenvolveranse nas instalacións do Museo Interactivo da Historia de Lugo cunha duración de entre 5 e 10 días.

As propostas seleccionadas deberán desenvolver ao longo da súa estadía unha sesión aberta da residencia para público local ou a comunidade da danza galega ou realizar un obradoiro ao finalizar a estadía, e recibirán unha remuneración de entre 700 e 1500 euros. O prazo de presentación está aberto ata o vindeiro 31 de marzo, e a actividade deberá desenvolverse entre o 1 de maio e o 30 de outubro.