A Fundación Marta Ortega prevé investir 97 millóns en actividades na Coruña

O Boletín Oficial do Estado publicaba este 4 de marzo o expediente polo que a Fundación Marta Ortega solicita unha concesión no terreo portuario da Coruña para a súa actividade. Na mesma inclúense detalles do proxecto que a entidade que preside a responsable de Inditex prevé desenvolver neste terreo. En conxunto, a Fundación solicita nove anos de ocupación de 13.697 metros cuadrados deste espazo, no que xa está a desenvolver exposicións, e anuncia un investimento de 97 millóns de euros.

Destes, 40,7 millóns destinaranse ás adaptacións nas infraestruturas, á montaxe e aos traslados de material para as exposicións previstas no período, mentres outros 40,8 millóns cubrirán gastos de comunicación, a incluír visitas concertadas e deseño gráfico. O orzamento aínda conta con 7,4 millóns destinados a adaptar a nave principal e os silos que acollen os proxectos expositivos da entidade.

Segundo recolle o BOE, a solicitude de cesión é de seis anos, con tres de prórroga, e inclúe a actual nave que acolle as mostras, os silos onde se instalou a cafetaría, unha tenda e as zonas anexas do porto.

As exposicións preséntanse como a principal actividade prevista neste período, centradas "na arte en xeral e na fotografía en particular" que manterán entrada libre e que estarán acompañadas por diferentes eventos. A isto súmanse programas educativos e de formación para estudantes.